Manchester United hedh sytë drejt talentit argjentinas që po shkëlqen në Serie A

Mesfushori Nico Paz po zhvillon një edicion fantastik me fanellën e Comos, duke u shndërruar në qendër të vëmendjes për një nga gjigantët e Premier Ligës, Manchester United. Sipas gazetarit dhe specialistit të njohur të transferimeve, Ekrem Konur, drejtuesit e klubit anglez po ndjekin me vëmendje hap pas hapi ecurinë e lojtarit dhe po planifikojnë një ofensivë të mundshme gjatë merkatos së verës që vjen. Pavarësisht interesimit serioz nga Anglia, një faktor kyç në këtë histori mbetet Real Madridi. Klubi madrilen gëzon të drejtën e një klauzole riblerjeje prej 80 milionë eurosh, e cila mund të ushtrohet në periudhën nga 1 deri më 15 korrik të vitit të ardhshëm. Në rast se drejtuesit e skuadrës spanjolle zgjedhin të mos e aktivizojnë këtë opsion, atëherë rruga do të jetë e hapur për Manchester United që të tentojë transferimin e 22-vjeçarit në Old Trafford. Megjithatë, arritja e një marrëveshjeje nuk do të jetë aspak e thjeshtë. Drejtuesit e Comos janë të vendosur të bëjnë çmos për të mbajtur në skuadër një ndër elementët e tyre më vendimtarë dhe potencialë.