Kërcënohet kalendari i Premierligës: Stuhia e fuqishme rrezikon ndeshjet e fundjavës në Angli

Britania e Madhe po bëhet gati të përballet me një stuhi të fuqishme atmosferike, e pagëzuar me emrin Boelo, e cila pritet të godasë vendin gjatë fundjavës dhe ka ngritur pikëpyetje serioze mbi fatin e disa prej ndeshjeve të Premierligës angleze. Zyra e meteorologjisë në Mbretërinë e Bashkuar, Met Office, ka ngritur alarmin përmes paralajmërimeve zyrtare për erëra tejet të fuqishme dhe reshje intensive shiu. Zona më e rrezikuar aktualisht mbetet veriu i Anglisë, ku mund të cënohet mbarëvajtja e takimeve të planifikuara për ditën e diel. Sipas njoftimeve nga shtypi britanik, shqetësimet më të mëdha përqendrohen te përballja mes Manchester Unitedit dhe Bournemouthit në stadiumin "Old Trafford", si dhe te duelja mes Liverpoolit dhe Brightonit në "Anfield". Të dyja këto ndeshje madhore janë caktuar të luhen të dielën, duke filluar nga ora 15:00 me kohën lokale. Megjithatë, deri në këto momente nuk ekziston ende një vendim apo konfirmim zyrtar për ndonjë shtyrje të mundshme. Moti i keq vjen në një kohë kur Britania sapo ka kaluar pasojat e stuhisë Austen, e cila goditi rajone të ndryshme gjatë ditës së premte. Meteorologët e Met Office kanë bërë me dije se në zonat më të cënueshme, shpejtësia e erës rrezikon të kapërcejë shifrën e 130 kilometrave në orë. Përveç pikëpyetjeve mbi fatin e takimeve sportive, kushtet ekstreme paralajmërojnë edhe bllokime e vështirësi në qarkullimin rrugor dhe atë hekurudhor, gjë që mund ta bërë tejet të ndërlikuar udhëtimin e tifozëve drejt stadiumeve. Pavarësisht situatës alarmante, autoritetet bëjnë të ditur se për momentin nuk ka ndryshime në oraret e ndeshjeve dhe ato mbeten në fuqi. Hapat e mëtejshëm dhe vendimet përfundimtare do të merren në varësi të ecurisë së kushteve atmosferike dhe raporteve të sigurisë përpara fërshëllimës së parë të gjyqtarëve.