Fluturim privat drejt Londrës për Lamine Yamal: Ylli i Barçës synon kurorëzimin historik me Topin e Artë

Lamine Yamal ka siguruar një fluturim privat për t'u nisur drejt Londrës, ku ditën e hënë do të zhvillohet edicioni i 70-të jubilar i ndarjes së çmimeve prestigjioze “Topi i Artë”, organizuar nga “France Football” në bashkëpunim të ngushtë me UEFA-n. Sipas raportimeve të mediave spanjolle, talenti i madh i Barcelonës do të ketë një mbështetje të gjerë gjatë këtij udhëtimi, duke u shoqëruar nga prindërit e tij, partnerja Inés García, familjarë të tjerë, miq të ngushtë, si dhe anëtarë të stafit menaxherial. Vetëm 18 vjeç, Yamal synon që kësaj radhe të rrëmbejë për herë të tretë radhazi çmimin e futbollistit më të mirë të ri, ndërkohë që ambiciet e tij shtrihen edhe më gjerë, duke shpresuar në një triumf sensacional për çmimin e lojtarit më të mirë në rruzull. Kujtojmë se edicionin e kaluar, Yamal kishte organizuar një festë madhështore në Paris, por u detyrua të largohej para se ajo të përfundonte, pasi çmimi kryesor i u atribua Ousmane Dembélé. Përveç tij, në këtë ngjarje të madhe futbollistike do të marrë pjesë një delegacion i fuqishëm institucional i klubit katalanas, në krye me presidentin Joan Laporta. Blaugrana do të përfaqësohet në kategori të ndryshme edhe nga emra të tjerë të shquar si Pau Cubarsí. Ndërkohë, në kategorinë e femrave, ylli Alexia Putellas konsiderohet si pretendentja kryesore për të fituar “Topin e Artë”, Vicky Lopez synon majat te talentet e reja, ndërsa Joan Garcia dhe Cata Coll janë në garë të fortë për çmimet e portierëve më të mirë të vitit.