Zeka: Administrata amerikane ka kushte të qarta për avancimin e partneritetit me Kosovën

Për të nxitur rritjen ekonomike dhe për të joshur investitorët e huaj, Kosova duhet domosdo të përshpejtojë përafrimin e legjislacionit të saj me standardet e Bashkimit Evropian, të shtojë investimet publike dhe të zhvillojë sektorin e energjisë. Megjithatë, thellimi i aleancës strategjike me Shtetet e Bashkuara të Amerikës mbetet i kushtëzuar nga zbatimi i detyrimeve që vendi ynë ka ndaj komuniteteve pakicë, sipas Arian Zekës, drejtor ekzekutiv i Odës Ekonomike Amerikane në Kosovë. Në një prononcim për mediat, Zeka ka vënë në dukje se bllokimet dhe mosfunksionimi i duhur i institucioneve gjatë periudhës së fundit kanë lënë në harresë shumë detyra dhe projekte thelbësore. “Ka shumë detyra dhe ka shumë punë të cilat nuk janë realizuar përgjatë viteve të fundit. Natyrisht, për shkak të mos funksionimit të institucioneve, do ta theksoja, meqenëse ne synojmë që të anëtarësohemi në strukturat euroatlantike, në Bashkimin Evropian dhe në NATO. Besoj që vazhdimi i reformës së legjislacionit sipas kërkesave të Bashkimit Evropian, edhe atyre kërkesave që lidhen sidomos me instrumentet financiare të Bashkimit Evropian, prej të cilave nuk jemi mundur të përfitojmë sa duhet në këto dy-tre vitet e fundit, duhet të jetë prioriteti numër një. Pastaj natyrisht është rritja e investimeve publike. Fatkeqësisht, nuk po shohim diçka të tillë. Edhe lajmet e ditëve të fundit kanë sugjeruar të kundërtën, domethënë tkurrjen e buxhetit për investimet kapitale në favor të skemave të tjera, përfshirë edhe skemat sociale, të cilat natyrisht që nuk e kanë efektin e duhur zinxhiror në ekonominë e vendit”, deklaron Zeka. Duke analizuar drejtimet ku ekzekutivi duhet të përqendrojë energjitë për të garantuar zhvillim të qëndrueshëm, ai ka veçuar disa sektorë kyçë. “Fokusi duhet të jetë në zhvillimin e kapaciteteve energjetike. Vendi duhet të sigurojë energji të mjaftueshme për zhvillimin e tij. Edhe natyrisht zgjerimi ose përmirësimi i infrastrukturës së teknologjisë. Nëse synojmë si shtet tërheqjen e investitorëve në qendrat e të dhënave, ose data centers siç njihen në gjuhën angleze, atëherë natyrisht që nevojitet energji stabile”, thotë Zeka. Lidhur me gjendjen aktuale të raporteve dypalëshe ndërmjet Prishtinës zyrtare dhe Uashingtonit, kreu i Odës Amerikane vlerëson se ato lënë vend për përmirësim të ndjeshëm. “Patjetër që po, ne patëm edhe një deklaratë nga një përfaqësues i Departamentit Amerikan të Shtetit javë më parë, i cili tha që vazhdimi ose jo i diskutimit të partneritetit strategjik ndërmjet Kosovës edhe SHBA-së mbetet peng, ose do të vazhdojë në momentin kur Kosova të përmbushë detyrimet e saj ndaj komuniteteve pakicë në shtet. Ka një rrugë të qartë, ka një kërkesë të qartë nga ana e administratës amerikane se çfarë duhet të bëjë Kosova ashtu që pastaj partneriteti ynë të kalojë në një nivel tjetër, të cilin po e shohim për disa shtete fqinje të Ballkanit Perëndimor”, thekson Zeka.