Protesta po, dhuna jo! Ministri i Drejtësisë lëshon paralajmërimin e fortë për të rinjtë

Ministri i Drejtësisë, Toni Gogu, ka përcjellë sot një apel sensibilizues drejtuar brezit të ri, duke vënë në pah se ndonëse protesta është një e drejtë kushtetuese e garantuar, ajo nuk duhet të përdoret kurrsesi si mburojë për sjellje të dhunshme. Nëpërmjet një reagimi të shpërndarë në platformat dixhitale, Gogu ka theksuar domosdoshmërinë e respektimit të rendit gjatë tubimeve publike, duke tërhequr vëmendjen se çdo kapërcim i kufijve ligjorë përmes dhunës shoqërohet pashmangësisht me ndëshkim penal. “E drejta për të protestuar është e garantuar. Dhuna nuk është pjesë e saj. Përfshirja në akte dhune mund të sjellë përgjegjësi penale. Qendra e Parandalimit të Krimeve të të Miturve dhe të Rinjve (QPKMR) ndërgjegjëson të rinjtë për përgjegjësinë dhe pasojat ligjore. Të mbrojmë të drejtat, duke respektuar ligjin”, ka shkruar kreu i Drejtësisë. Në materialin filmik të publikuar në rrjetet sociale nga vetë ministri, Elsa Salillari, e cila mban detyrën e përgjegjëses së sektorit pranë Qendrës së Parandalimit të Krimeve të të Miturve dhe të Rinjve, ka sqaruar se liria e shprehjes nëpërmjet protestës nuk e shmang askënd nga llogaridhënia personale për aktet e paligjshme. “Ushtrimi i të drejtës për të protestuar nuk përjashton të drejtën e përgjegjësisë individuale për veprime që përbëjnë vepër penale, sipas legjislacionit ne fuqi. Dhuna dhe veprime të tjera të parashikuara në Kodin Penal sjelli pasoja ligjore”, u shpreh ajo.