Kthesë e madhe e Borussia Monchengladbach ndaj Stuttgartit, Wael Mohya njeriu i ndeshjes

Borussia Monchengladbach ka regjistruar triumfin e parë sezonal në elitën e futbollit gjerman, Bundesligë, duke e mposhtur Stuttgartin si mysafir me shifrat 3:2, në kuadër të xhiros së shtatë. Faktori kryesor i kësaj fitoreje ishte lojtari i mysafirëve, Wael Mohya, i cili kontribuoi me një gol dhe një asistim, duke udhëhequr skuadrën drejt kthesës spektakolare. Vendasit e nisën sfidën në mënyrën më të mirë të mundshme, duke zhbllokuar shifrat që në minutën e pestë me anë të Ermedin Demiroviq. Ai realizoi një goditje nga distanca, duke përfituar nga një pasiguri e portierit të Borussia Monchengladbach. Megjithatë, pas startit më të mirë të vendasve, skuadra nga Monchengladbach u konsolidua dhe vendosi ekuilibrin në minutën e 38-të. Pas një tentimi nga Uno, Joe Scally ndryshoi trajektoren e topit me thembër në mënyrë artistike, duke e dërguar në rrjetë për 1:1. Fraksioni i dytë nisi sërish me dominimin e mysafirëve, të cilët realizuan përmbysjen e madhe në minutën e 51-të. Mohya demonstrore klasin e tij me një aksion individual, duke lënë pas mbrojtësit dhe duke shërbyer Shuto Machinon, i cili nuk gaboi për 1:2. Në minutën e 66-të, skuadra udhëtuese ndëshkoi vendasit përmes një kundërsulmi vrastar për të ngritur epërsinë. Pas një aksioni të rrezikshëm zhvilluar nga Scally, i cili krosoi në zonë, Wael Mohya u tregua i vëmendshëm dhe goditi saktë me kokë për të çuar rezultatin në 1:3. Pavarësisht kësaj, Stuttgarti nuk u dorëzua dhe në minutën e 83-të Ermedin Demiroviq realizoi golin e tij të dytë personal dhe të skuadrës, duke ngushtuar shifrat në 2:3. Kjo përballje dramatike u zhvillua në stadiumin “MHP Arena”, në prani të 60 mijë adhuruesve të pranishëm. Pas këtij takimi, Borussia Monchengladbach pozicionohet në vendin e 18-të me 3 pikë të grumbulluara, ndërsa Stuttgarti mban vendin e 14-të me 6 pikë.