Fjalimi viral kundër kreut të qeverisë, Samanta Toçka: Ai nuk është më kryeministri im, do të mbahet mend për errësirën e pushtetit

Studentja Samanta Toçka, e cila fitoi vëmendjen e opinionit publik përmes një fjalimi të ashpër drejtuar kreut të ekzekutivit Edi Rama, ka bërë thirrje për një dalje masive në protestën e paralajmëruar për nesër në kryeqytet. E ftuar në një studio televizive, ajo u ndal te klima e pasigurisë që, sipas saj, po tentohet të instalohet nga qeveria. Gjatë fjalës së saj, Toçka vuri në dukje se frika e përhapur nga kreu i qeverisë ka sjellë një farë tërheqjeje të përkohshme tek disa prej bashkëmoshatarëve të saj, por këmbënguli se rinia nuk duhet tërhiqet apo të heshtë. Ajo përshëndeti mbështetjen e ardhur nga mjekët dhe pedagogët, duke theksuar domosdoshmërinë që akademikët dhe profesionistët t'i qëndrojnë pranë rinisë në këtë betejë për të drejtat e tyre. Më tej, studentja ngriti akuza të forta ndaj kryeministrit, duke e cilësuar atë si një lider të rrjeteve sociale që u përgjigjet thirrjeve për dialog me nota ironie. Sipas saj, kreu i qeverisë po nxit dhunën me qëllim ruajtjen e karriges, ndërkohë që u bëri thirrje qytetarëve, pavarësisht bindjeve politike apo profesioneve, t'i bashkohen sheshit. Duke sqaruar natyrën e tubimit, Toçka theksoi se bëhet fjalë për një lëvizje të mirëfilltë studentore, e cila mirëpret çdo qytetar të thjeshtë apo edhe mbështetës të opozitës, pasi të gjithë ndajnë të njëjtat shqetësime. Ajo shtoi se prindërit janë shqetësuar për sigurinë e fëmijëve të tyre, veçanërisht pas episodeve të dhunës në komisariate. Në përmbyllje të qëndrimit të saj, studentja u shpreh e prerë në lidhje me legjitimitetin e kreut të qeverisë. "Ka katër muaj që Rama nuk është më kryeministri im," u shpreh ajo, duke paralajmëruar se ai do të mbetet në kujtesën e shqiptarëve si një nga figurat më të errëta të politikës, e cila sakrifikon çdo gjë vetëm për interesa personale pushteti.