Valë shkarkimesh në administratë: Zbardhet lista e drejtorëve që dorëzuan detyrën pas ultimatumit të Ramës

Pas thirrjes së prerë të kryeministrit Edi Rama për largimin e menjëhershëm të drejtuesve të institucioneve dhe ndërmarrjeve në varësi të ministrive, ka nisur vala e dorëheqjeve. Ergys Verdho, i cili drejtonte Hekurudhën Shqiptare, ishte zyrtari i parë që formalizoi largimin e tij, duke i hapur rrugë një zinxhiri dorëheqjesh në institucionet kyçe të vendit. Ndërkohë, lëvizjet kanë prekur edhe poste të tjera të rëndësishme. Ilir Binaj është larguar nga drejtimi i Përgjithshëm i Tatimeve, Besmir Beja ka lënë postin te Doganat, ndërsa Jonaid Myzyri është tërhequr nga Operatori i Blerjeve të Përqendruara. Po ashtu, dorëheqjen e ka paraqitur edhe Etugert Llazi, kreu i Qendrës Kombëtare të Biznesit. Procesi i spastrimit të administratës ka përfshirë edhe drejtoreshën e Përgjithshme të Burgjeve, Sadleva Bodo, e cila ishte emëruar në këtë detyrë vetëm nëntë ditë më parë, konkretisht më 14 tetor, pas largimit të paraardhësit të saj Adriatik Kupi. Urdhri i ekzekutivit u është përcjellë zyrtarëve nga ministrat e linjës, ndërsa i gjithë procesi pritet të përmbyllet plotësisht brenda ditës së hënë, më 26 tetor. Kërkesa për lënien e detyrës i është drejtuar gjithashtu Besmir Kolës, drejtor i Përgjithshëm i Shërbimit të Provës, Ergys Qiricit në krye të Përmbarimit, si dhe Valdrin Pjetrit, i cili drejtonte Agjencinë e Trajtimit të Pronave. Në këtë listë figuron edhe Eduard Merkaj, në krye të Agjencisë së Mbikëqyrjes në Sistemin e Ekzekutimit të Vendimeve Penale. Lëvizjet kanë prekur thellësisht edhe sektorin e infrastrukturës dhe energjisë. Gjatë një mbledhjeje të zhvilluar në orën 18:30, ministri Enea Karakaçi u ka komunikuar urdhrin e largimit drejtuesve të kompanive publike në varësi të tij. Mes emrave që kanë lënë detyrën janë Eltar Deda i Albpetrolit, Ami Kozeli në krye të Autoritetit Rrugor Shqiptar (ARRSH), Elisian Bici i Operatorit të Sistemit të Transmetimit (OST), si dhe Viola Haxhiademi, administratore e Korporatës Elektroenergjetike Shqiptare (KESH). Në listën e të larguarve përfshihet edhe Dritan Isaku, drejtor i Përgjithshëm i Albcontrol. Nga ana tjetër, Ergys Verdho, i cili më herët ka drejtuar edhe ARRSH-në dhe KESH-in, i shtohet listës së zyrtarëve që kanë braktisur postin e fundit te Hekurudha Shqiptare. Vendimi ka prekur gjithashtu Silda Anagnosti Çepen, administratore e IdentiTek, dhe Ervin Koçin, drejtor i Përgjithshëm i Agjencisë së Inteligjencës Financiare. Ndryshimet shtrihen edhe në agjencitë e tjera shtetërore, ku Laura Plaku Saro është larguar nga Agjencia Shqiptare e Zhvillimit të Investimeve, Ardita Kuçi nga Agjencia për Zhvillim Bujqësor dhe Rural, si dhe Marjeta Përlala nga drejtimi i Agjencisë Kombëtare të Mjedisit. Deri të hënën pritet të finalizohet dorëzimi i të gjitha dokumenteve të dorëheqjes për pjesën tjetër të zyrtarëve.