“E jetove me guxim si një Lea e vërtetë” – Alban Skënderaj dedikim prekës për ndarjen nga jeta të artistes Rinesancë

Këtë të mërkurë, skena muzikore shqiptare ka humbur një nga talentet e saj të reja, pasi artistja e njohur nga Kosova, Rinesa Qeriqi, e njohur me emrin artistik Rinesancë, është ndarë nga jeta në moshën 25-vjeçare, pas një lufte të gjatë me një tumor në tru. Ikja e parakohshme e së resë ka tronditur thellësisht komunitetin artistik, duke nxitur valë ngushëllimesh nga figura të shquara të muzikës dhe artit. Mes atyre që kanë ndarë dhimbjen publikisht është edhe kantautori i njohur Alban Skënderaj, i cili e ka kujtuar Rinesën përmes bashkëpunimit të tyre të kaluar, ku ajo kishte interpretuar rolin e “Leas” në një nga videoklipet e tij. “Prehu në paqe Rinesa. Edhe pse tepër shkurt, e jetove jetën me guxim, si një ‘Lea’ e vërtetë”, shkruan ndër të tjera Skënderaj në mesazhin e tij emocionues. Rinesa ishte diagnostikuar me këtë sëmundje të rëndë në vitin 2025, periudhë gjatë së cilës ajo iu nënshtrua disa ndërhyrjeve kirurgjikale dhe cikleve të rrezatimit. Për shkak të përkeqësimit të vazhdueshëm të shëndetit dhe kostove të larta të mjekimit, familjarët e saj kishin bërë thirrje publike për ndihmë financiare nga dashamirësit. Me origjinë nga Prishtina, Rinesa Qeriqi ishte autore e disa projekteve muzikore, duke kontribuar si këngëtare, tekstshkruese dhe kompozitore, ndërkohë që aktivitetin e saj krijues e zhvillonte në Kanada.