Alarmi nga terreni: Dhjetëra raste dhune në familje dhe krime të rënda brenda vetëm një jave në vend

Gjatë harkut kohor prej shtatë ditësh, saktësisht nga 16 deri më 23 tetor, Zyra për Mbrojtje dhe Ndihmë të Viktimave (ZMNV) ka evidentuar dhe trajtuar 64 raste të reja në të gjithë territorin e Republikës së Kosovës. Prej tyre, plot 46 raste kanë qenë të lidhura me dhunën në familje, duke shënuar shifrën më të lartë të shqetësimit gjatë kësaj periudhe. Sipas të dhunave zyrtare të bëra publike nga Sistemi Prokurorial, përveç dhunës në familje, autoritetet janë marrë edhe me vepra të rënda penale. Konkretisht, është regjistruar një rast vrasjeje, dy tentativa vrasjeje, një rast i krimeve të luftës, dy raste të kanosjes, si dhe një rast që lidhet me degradimin e integritetit seksual. Statistikat tregojnë gjithashtu se gjatë kësaj jave janë trajtuar edhe tri raste të sulmeve fizike, katër raste të lëndimeve të lehta trupore, dy raste dhunimi, një rast i braktisjes apo keqtrajtimit të fëmijëve, si dhe një rast i mospërfilljes së urdhrave të gjykatës. Në rrafshin e procedurave ligjore, gjatë kësaj jave janë mbajtur gjithsej 74 seanca në gjykata dhe 18 të tjera në prokurori. Ndërkaq, sa i përket vendimeve gjyqësore, janë shënuar shtatë aktgjykime dënuese, një aktgjykim refuzues dhe një lirues. Angazhimi i kësaj zyre ka përfshirë edhe veprime të tjera mbështetëse për viktimat, ku janë evidentuar një ankesë, 10 parashtresa, tri përfaqësime para autoriteteve policore dhe një përfaqësim i drejtpërdrejtë në strehimore. Po ashtu, gjatë kësaj periudhe janë regjistruar gjashtë kërkesa për urdhër mbrojtjeje që janë në proces, gjashtë kërkesa të tjera tashmë të aprovuara, si dhe një kërkesë që është tërhequr nga vetë pala e dëmtuar. Në kuadër të asistencës dhe këshillimit, Zyra për Mbrojtje dhe Ndihmë të Viktimave ka siguruar 15 deklarata pëlqimi nga viktimat dhe ka ofruar 36 këshilla juridike. Gjatë kësaj kohe është realizuar nga një referim i rastit në Qendrën për Punë Sociale (QPS), në strehimore dhe në Agjencinë për Ndihmë Juridike Falas (ANJF), si dhe janë përpiluar 17 shënime zyrtare.