Tifozët të gëzuar: Data e saktë e rikthimit sensacional të Ronaldinhos në fushën e blertë

Tifozët e futbollit anembanë botës do të kenë sërish mundësinë të shohin magjinë e Ronaldinhos në një ndeshje zyrtare, pasi rikthimi i tij është zyrtarizuar tashmë për datën 15 nëntor 2026. Presidenti i klubit italian Ravenna, Ignazio Cipriani, ka konfirmuar se ish-ylli i Barcelonës dhe Milanit do të djersitë fanellën e skuadrës së tij në derbin e zjarrtë të Serie C kundër Forlìt. “Magjia nuk është shuar kurrë; tani ka ardhur momenti për ta rikthyer në fushë. Ky kthim është plotësisht real,” u shpreh kreu i Ravennas përmes një deklarate zyrtare për agjencinë e lajmeve “Ansa”. Cipriani pranoi se projekti fillimisht dukej i pamundur, por falë përkushtimit të të gjithë strukturës drejtuese, ëndrra është bërë realitet dhe do të materializohet në stadiumin “Benelli”. Kujtojmë se marrëveshja me fituesin e Topit të Artë u zyrtarizua gjatë një eventi të veçantë të mbajtur në qershor në qytetin e Miamit. Megjithëse 46-vjeçari ende nuk ka nisur seancat stërvitore me grupin e ri, ai ka ndjekur nga afër ecurinë e skuadrës, ndërsa vëllai dhe njëkohësisht agjenti i tij, Roberto De Assis, është parë në shkallët e stadiumit gjatë muajit shtator. Edhe pse numri i saktë i minutave që do të luajë mbetet ende për t'u parë, konfirmimi i pranisë së tij në fushë i ka dhënë fund çdo dileme. Bëhet fjalë për një rikthim historik, duke marrë parasysh se ish-përfaqësuesi i kombëtares së Brazilit e ka zhvilluar ndeshjen e tij të fundit zyrtare më shumë se një dekadë më parë, saktësisht në vitin 2015, kur mbante veshur fanellën e Fluminenses.