Inovacioni te Dortmundi: Dhurohen fanella zyrtare për tifozët që heqin dorë nga telefoni gjatë ndeshjeve

Për mbështetësit e skuadrës së njohur gjermane, Borussia Dortmund, fikja e celularit gjatë përballjeve në stadium mund të shpërblehet me dhurata të vlefshme. Klubi ka bërë publike nismën e re që synon të nderojë ata tifozë që zgjedhin të mos i përdorin pajisjet e tyre inteligjente sa herë që ndodhen në shkallët e stadiumit. Për të bërë të mundur këtë, Dortmundi ka vënë në dispozicion shpërblime të ndryshme, si fanella të firmosura nga lojtarët dhe kuponë për blerjen e artikujve zyrtarë të klubit. Këto dhurata u dedikohen atyre që shkarkojnë dhe përdorin një aplikacion special, i cili regjistron numrin e herëve që përdoruesi e zhbllokon telefonin gjatë kohës që ndodhet brenda impiantit sportiv. Mekanizmi i fitimit të pikëve bazohet te mbajtja e ekranit të fikur gjatë gjithë kohës së lojës, duke bërë përjashtim vetëm gjatë intervalit të pjesës së parë. Ata mbështetës që arrijnë të grumbullojnë sasinë më të lartë të pikëve do të jenëfituesit e këtyre surprizave. Sipas drejtuesve të klubit, ky hap vjen si përgjigje ndaj ankesave të shumta nga vetë spektatorët, të cilët shprehen të shqetësuar kur shohin se si tifozët e tjerë shpërqendrohen duke bërë fotografi, transmetuar pamje apo duke lundruar në rrjetet sociale në vend që t'i kushtojnë vëmendje ngjarjes në fushë.