Tensione të jahta në Serbi: Vuçeviq lëshon kërcënime pas ndalimit të nëntë personave në Zubin Potok

Kryetari i Partisë Përparimtare Serbe dhe njëkohësisht ish-kryeministri i Serbisë, Millosh Vuçeviq, ka ashpërsuar tonet ndaj Kosovës, pas operacionit policor në Zubin Potok ku u arrestuan nëntë serbë të dyshuar për krime lufte. Nëpërmjet një postimi në platformën X, Vuçeviq ka marrë në mbrojtje të ndaluarit, duke hedhur pretendime për gjoja padrejtësi dhe duke aluduar se ndaj tyre po ndërmerret një fushatë persekutimi mbi baza etnike. Ai gjithashtu ka pohuar se gjatë këtij aksioni policor është vënë në pranga edhe një 90-vjeçar, ndërsa ka përsëritur se qëllimi i këtyre veprimeve është përhapja e frikës mes komunitetit serb në pjesën veriore të vendit. Më tej, politikani serb ka drejtuar akuza ndaj kryeministrit të Kosovës, Albin Kurti, duke pretenduar se përmes hetimeve për krime lufte po bëhet politikë ditore dhe po tentohet të minimizohet vëmendja nga zhvillimet gjyqësore që lidhen me ish-udhëheqësit e UÇK-së. Vuçeviq ka bërë të ditur se formacioni i tij politik dhe Beogradi zyrtar do të mbështesin familjarët e të arrestuarve, duke u siguruar atyre mbështetje juridike. "Po i themi Prishtinës dhe komunitetit ndërkombëtar se askush nuk do ta frikësojë popullin serb dhe se nuk do të qëndrojmë të heshtur", ka shkruar Vuçeviq në tonet e një kërcënimi të hapur.