Goditet baza e drogës në Itali: Sekuestrohet plantacioni me mbi 1 mijë rrënjë kanabis, vihet në pranga një shqiptar

Autoritetet italiane kanë ndërmarrë një operacion të gjerë antidrogë, ku kanë zbuluar një plantacion të brendshëm me 1.206 bimë kanabisi në Coassolo Torinese, vlera e të cilave në tregun e zi llogaritet mbi 1 milion euro. Gjatë këtij aksioni është arrestuar një shtetas shqiptar, i cili dyshohet se merrej drejtpërdrejt me kultivimin e lëndës narkotike, ndërsa pesë bashkatdhetarë të tjerë janë vendosur nën hetim. Karabinierët e zonës lokalizuan strukturën e sofistikuar të ngritur brenda një magazine të izoluar dhe të rrethuar nga pyjet. Për të garantuar kushtet optimale të rritjes së bimëve, ambienti ishte përshtatur me pajisje moderne ndriçimi, ngrohjeje dhe ventilimi të posaçëm. Sipas informacioneve zyrtare, i arrestuari, banues në qytetin e Astit, u dërgua menjëherë në ambientet e paraburgimit në burgun e Ivreas, ndërkohë që e gjithë magazina dhe pajisjet teknologjike u sekuestruan nga policia. Bimët e gjetura kapnin një vlerë marramendëse në tregun e paligjshëm të narkotikëve. Ky operacion përbën kulmin e një hetimi të nisur në janar të vitit 2026 nga Njësia Hetimore e Komandës Provinciale të Karabinierëve të Astit, nën mbikëqyrjen e ngushtë të Prokurorisë së Republikës në po këtij qyteti. Në qendër të vëmendjes së hetuesve është një grup kriminal me origjinë shqiptare, të dyshuar për trafikim të lëndëve narkotike dhe armëmbajtje pa leje. Pista e hetimeve sugjeron se këto aktivitete të paligjshme mund të kenë lidhje edhe me funksionimin e një lokali nate në qytetin e Astit. Një kthesë e rëndësishme në këtë çështje ndodhi më 20 prill 2026, kur gjatë kontrolleve në dy prona që përdoreshin nga një 47-vjeçar shqiptar, blutë zbuluan dhe sekuestruan rreth 22 kilogramë kokainë, pesë pistoleta, një silenciator artizanal si dhe mbi 200 fishekë luftarakë. Nga verifikimet e kryera, u konstatua se njëra prej armëve kishte numrin serial të fshirë, kurse pistoletat e tjera dyshohet se janë produkt i vjedhjeve të ndryshme. Po ashtu, në vendngjarje u gjetën pajisje të ndryshme që shërbenin për peshimin dhe paketimin e dozave të drogës. Sasia e madhe e kokainës përfaqësonte dhjetëra mijëra doza, vlera e të cilave në tregun e zi kap shifrat e disa milionë eurove. Hetimet vijuan pa ndërprerje dhe më 21 korric 2026, autoritetet identifikuan dhe referuan për ndjekje penale pesë persona të tjerë nga Shqipëria për përfshirje të dyshuar në rrjetin kriminal. Ndërkohë, më 20 tetor, organet e rendit zhvilluan 13 kontrolle të autorizuara nga gjykata në Asti, në disa komuna të provincës dhe në zonën e Coassolo Torinese. Gjatë kësaj faze, në njërën nga banesat e të dyshuarve u gjet një sasi e vogël lënde narkotike, ndërsa në një tjetër u sekuestruan 100 fishekë armësh zjarri. Një nga detajet që ngriti dyshimet e hetuesve ishte edhe konsumi jashtëzakonisht i lartë i energjisë elektrike në magazinën e kanabisit. Ekspertët e operatorit të shpërndarjes llogaritën se impianti i lidhur në mënyrë abuzive konsumonte nga 80 deri në 100 kilovat-orë në ditë, energji e cila shkonte plotësisht për të mbajtur në punë sistemet e ndriçimit, ngrohjes dhe kontrollit të klimës për bimët.