Nis misioni botëror: Kosova kërkon triumfin e parë ndaj Estonisë në Prishtinë

Kombëtarja e Kosovës në hendboll (femra) do të nisë mbrëmjen e sotme fushatën e saj kualifikuese për Kampionatin Botëror, me synimin e qartë për të kaluar me sukses pengesën e parë dhe për të siguruar biletën për në fazën përfundimtare. Përfaqësuesja jonë do të masë forcat me Estoninë në një përballje të dyfishtë, e cila do të zhvillohet e afriruar në kryeqytet, saktësisht në ambientet e Pallatit të Rinisë dhe Sporteve në Prishtinë. Takimi hapës do të luhet sonte me fillim nga ora 20:00, kurse ndeshja e kthimit është caktuar të mbahet të shtunën, duke nisur nga ora 17:00. Përfaqësuesja që do të tregojë paraqitje më të mirë dhe do të regjistrojë bilanc më të suksesshëm në këto dy ndeshje do të avancojë tutje, në raundin e fundit të kualifikimeve për ngjarjen e madhe botërore të vitit të ardhshëm. Synimi i vajzave tona është vazhdimi i ecurisë pozitive dhe traditës së krijuar në dy ciklet e kaluara kualifikuese, ku Kosova kishte arritur me sukses ta kalonte fazën e parë eliminatore. Në rrugëtimin për Botërorin 2023, Kosova paturballur me Ishujt Faroe në ndeshjet e zhvilluara në Istog. Më 3 nëntor 2022, hendbollistet kosovare shënuan fitore me shifrat 27:24, ndërsa dy ditë më vonë, pavarësisht humbjes 29:28, epërsia e ndeshjes së parë i mjaftoi Kosovës për të kaluar tutje, për t'u ndalur më pas në fazën e radhës nga Polonia. Edhe në eliminatoret për Kampionatin Botëror 2025, Kombëtarja e Kosovës la mbresa mjaft pozitive. Në turneun grupor të raundit të parë të mbajtur në Hasselt të Belgjikës, “Dardanet” triumfuan fillimisht ndaj nikoqireve belge me rezultat 32:28 më 25 tetor 2024, kurse një ditë më vonë shënuan fitore tjetër të rëndësishme kundër Bosnjë-Hercegovinës me rezultatin 32:26. Megjithatë, hapi i tyre u ndal në raundin e dytë kualifikues, ku u eliminuan nga një kundërshtare e fortë si Suedia. Përballë Estonisë, ekipi kosovar hyn në parket si favorit në letër, por për të arritur objektivin dhe për ta arsyetuar këtë status, vajzave tona do t'u duhet angazhim maksimal, maturi dhe përqendrim i plotë përgjatë të dyja ndeshjeve.