Lëkundje të fuqishme sizmike godasin Italinë, epiqendra regjistrohet në rajonin e Sicilisë

Një tërmet me magnitudë 5.6 të shkallës Rihter ka tronditur ditën e sotme rajonin italian të Sicilisë, sipas të dhënave zyrtare të bëra publike nga Qendra Sizmologjike Euro-Mesdhetare (EMSC). Fenomeni natyror është regjistruar saktësisht në orën 12:19 me orën lokale, ndërsa vatra e tij ka qenë në një thellësi prej 10 kilometrash nën tokë. Sipas matjeve sizmologjike, epiqendra e lëkundjeve është lokalizuar rreth 99 kilometra në verilindje të qytetit të Palermos dhe 76 kilometra në veriperëndim të zonës së Capo d'Orlando. Autoritetet kompetente njoftojnë se deri në këto momente nuk ka ende asnjë raportim zyrtar lidhur me dëme materiale apo persona të lënduar nga ky aktivitet sizmik.