Paketa e re e ndihmës: BE-ja shprehet e gatshme të mbulojë mbi 46 miliardë euro për Ukrainën

Bashkimi Evropian është shprehur i hapur për të financuar dy të tretat e paketës shtesë prej 70 miliardë eurosh të kërkuar nga Kievi, shifër kjo që përkthehet në afro 46.7 miliardë euro. Ky qëndrim u bë i ditur nga vetë presidenti i Këshillit Evropian, Antonio Costa. “Tradicionalisht, ne mbulojmë dy të tretat e nevojave financiare të Ukrainës. Gjatë mbledhjes së fundit të Këshillit Evropian, ne ramë dakord t'i përgjigjemi kërkesave shtesë të Kievit, duke i ngarkuar Komisionit Evropian detyrën për të hartuar mekanizma konkretë zbatimi”, u shpreh Costa gjatë një intervistë. Kreu i Këshillit Evropian nënvizoi se institucionet evropiane janë duke punuar intensivisht në këtë drejtim dhe se vendimmarrja mund të arrihet brenda muajit nëntor. Në rast se liderët evropianë nuk arrijnë një konsensus gjatë samitit të jashtëzakonshëm të caktuar për datat 26-27 nëntor, bisedimet do të shtyhen për në takimin e radhës të parashikuar për 17-18 dhjetor. Përveç angazhimit të vet, Brukseli u ka bërë thirrje edhe partnerëve ndërkombëtarë, si Mbretëria e Bashkuar, Kanadaja dhe Norvegjia, që të shtojnë fondet e tyre me qëllim plotësimin e nevojave të reja buxhetore të Ukrainës. Kujtojmë se pak kohë më parë, gjatë një samiti të BE-së, presidenti ukrainas Volodymyr Zelensky paraqiti nevojën urgjente për 70 miliardë euro shtesë, të cilat do të destinohen për të mbuluar shpenzimet ushtarake gjatë vitit 2027. Kjo kërkesë e papritur e Kievit kishte shkaktuar fillimisht habi mes zyrtarëve të lartë evropianë, sipas raporteve të mediave ndërkombëtare të publikuara në mesin e muajit tetor. Në këtë linjë, vlen të theksohet se shtetet anëtare të Bashkimit Evropian kanë miratuar tashmë një paketë të mëparshme prej 90 miliardë eurosh, e cila është planifikuar të disburohet gjatë dy viteve të ardhshme.