Goditet “banka e fshehur” e krimit: Mbi 110 milionë euro fatura të rreme dhe pastrim parash, në pranga italianë e shqiptarë

Një strukturë financiare klandestine që funksiononte si “bankë e fshehur” në shërbim të krimit të organizuar transnacional është çmontuar nga autoritetet italiane, në një operacion ku janë përfshirë edhe shtetas shqiptarë. Kjo rrjetë ishte e aftë të lëvizte shifra të jashtëzakonshme parash përtej kufijve të Italisë, duke shtrirë degëzimet e saj deri në rajonin e Ticinos. Sipas hetimeve, burimi i këtyre fondeve të paligjshme ishte kryesisht evazioni fiskal, i shoqëruar nga aktivitetet e trafikut ndërkombëtar të armëve dhe lëndëve narkotike. Goditja erdhi si rezultat i një aksioni masiv të ndërmarrë nga Guardia di Finanza e Milanos dhe ajo e Monza Brianzës, nën drejtimin e Prokurorisë Publike dhe Drejtorisë së Qarkut Anti-Mafia dhe Terrorizëm të Milanos. Si pasojë e këtij operacioni, janë ekzekutuar tridhjetë masa sigurie, ku gjashtëmbëdhjetë persona janë dërguar në qeli kurse të tjerët janë lënë në arrest shtëpiak, ndërkohë që janë sekuestruar pasuri me vlerë mbi 21 milionë euro. Mes të arrestuarve spikat një 62-vjeçar i lindur në Napoli, i cili së bashku me 13 persona të tjerë përballet me akuzat e krijimit të organizatës kriminale dhe zbathjes së metodave mafioze, ku disa prej anëtarëve lidhen drejtpërdrejt me organizata famëkeqe si ‘Ndrangheta, Camorra dhe e ashtuquajtura Mafia e Katërt nga Foggia. Gjatë hetimeve është dokumentuar përdorimi i faturave të falsifikuara në vlerën e mbi 110 milionë eurove, si dhe pastrimi i 68 milionë eurove në rrugë ndërkombëtare përmes përdorimit të kriptovalutave. Sipas organit të akuzës, qendra e këtij skema të pastrimit të parave e kishte zanafillën në Lugano. Krahas arrestimeve, u ndërmorën kontrolle të gjera në disa provinca italiane, ku u angazhuan mbi 350 efektivë të Guardia di Finanza, trupa speciale dhe njësia antiterrorizëm. Operacioni u shtri gjithashtu në Ticino me mbështetjen e Njësisë I-Can të Interpolit dhe në bashkëpunim të ngushtë me ekspertët e sigurisë në Madrid dhe Bernë. Gjatë bastisjeve, autoritetet bllokuan shuma të konsiderueshme parash cash, llogari bankare, asete digjitale, automjete, mjete lundruese, bizhuteri, ora të shtrenjta dhe pajisje për numërimin e prerjeve monetare. Hetimet e drejtuara nga “Fiamme Gialle” zbuluan se kjo “bankë e fshehur” operonte në zonën e Peros, mes Komos dhe Milanos, e maskuar pas fasadës së një agjencie për qira automjetesh. Ajo drejtohej nga tre italianë të lidhur ngushtë me klanet mafioze, ku përfshiheshin dy bashkëpunëtorë të vjetër të ‘Ndranghetës nga Crotone dhe një përfaqësues i klanit Casalesi. Struktura kriminale mbështetej gjithashtu te bashkëpunëtorë me kombësi kineze dhe shqiptare, duke ndërtuar kështu një rrjet financiar tejmase efikas dhe plotësisht ilegal. Prokuroria e Milanos shpjegon se organizata ofronte shërbimin e lëshimit të faturave fiktive për transaksione që nuk kishin ndodhur kurrë, përmes një sërë kompanish guaskë. Pasi të dyshuarit merrnin pagesat për këto fatura të rreme, u kthenin shumën e barabartë në para të gatshme pronarëve të bizeve përmes një sistemi korrierësh të specializuar. Më pas, fondet e grumbulluara kaloheshin pothuajse në tërësi në llogari jashtë vendit ose investoheshin për blerjen e kriptomonedhave që nuk lënë gjurmë, operacione të cilat koordinoheshin nga i arrestuari në Lugano. Në këtë formë, kjo “bankë e fshehur” u siguronte klientëve të saj, kryesisht bosëve të drogës dhe evazionistëve fiskalë, të gjitha lehtësitë e një institucioni të vërtetë bankar, por duke shfrytëzuar metoda clandestine që garantonin zhvendosjen e kapitaleve të errëta pa rënë në sy të ligjit.