Sfidë e re për Elisa Spiropalin në Kuvend, merr postin e rëndësishëm në komitetin parlamentar

Deputetja e Partisë Socialiste, Elisa Spiropali, ka marrë një funksion të ri institucional, pasi është emëruar anëtare e Komitetit Parlamentar të Stabilizim-Asociimit. Vendimi u zyrtarizua gjatë seancës plenare të kësaj të enjteje, e cila u shoqërua me debate të ashpra dhe tensione të krijuara nga deputetët e opozitës brenda sallës ligjvënëse. Lajmi për këtë caktim u bë i ditur nga drejtuesi i seancës, Niko Peleshi, në kuadër të prezantimit të lëvizjeve dhe rikonfigurimeve në delegacionet e ndryshme parlamentare. Ky zhvillim erdhi në një atmosferë të tensionuar, ndërkohë që jashtë mjediseve të Kuvendit po zhvillohej një protestë e organizuar nga qytetarët dhe studentët. Krahas emërimit të Spiropalit, ndryshime ka pasur edhe sa i përket strukturës zëvendësuese të delegacionit. Për këtë pozicion, deputetja tjetër e maxhorancës, Evis Kushi, është caktuar si anëtare zëvendësuese. Gjatë procedurës së leximit të vendimeve, Peleshi u shpreh: “Në mbështetje të nenit 14 të Rregullores së Kuvendit, deputetja Elisa Spiropali… ju lutem zini vendet… caktohet anëtare e Komitetit Parlamentar të Stabilizim-Asociimit. Ndërsa deputetja Evis Kushi caktohet anëtare zëvendësuese në këtë delegacion”.