Start i ëndërruar në Ligën e Konferencës: Egnatia kalon në avantazh ndaj Aarhusit pas golit të Grudës

Skuadra e Egnatias ka nisur në mënyrën më të mirë të mundshme sfidën e Ligës së Konferencës kundër Aarhus FC, duke krijuar menjëherë epërsinë në rezultat. Heroi i minutave të para është shprehur Gruda, i cili ka zhbllokuar shifrat në favor të ekipit shqiptar. Ndeshja, e cila po vijohet të luhet në “Randers Arena”, ka dhuruar emocione të shumta që në start, ku rrogozhinasit kanë ditur të shfrytëzojnë më së miri superioritetin numerik në fushë. Momenti kryesor i kthesës ndodhi që në minutën e 3-të të takimit, kur Kahl u ndëshkua me karton të kuq pas një ndërhyrjeje të gabuar si lojtari i fundit pikërisht ndaj Grudës, duke e lënë Aarhusin me dhjetë lojtarë. Egnatia nuk është ndalur me kaq dhe ka vazhduar të kërkojë golin e dytë. Në minutën e 25-të, ishte sërish Gruda që provoi fatin e tij me një tjetër gjuajtje rreziku, por portieri vendas Hansen reagoi saktë duke larguar rrezikun dhe duke e dërguar topin në goditje nga këndi.