Partia Demokratike i drejtohet SPAK-ut për dhunën ndaj protestuesve dhe gazetarëve

Partia Demokratike ka ndërmarrë një hap zyrtar ligjor duke dorëzuar një kallëzim penal në Prokurorinë e Posaçme kundër Korrupsionit dhe Krimit të Organizuar (SPAK). Këtë vendim e ka bërë të publike kryetarja e Komisionit të Apelimit në këtë forcë politike, Adriana Kalaja, gjatë një deklarate për mediat ku theksoi se kjo masë vjen në mbrojtje të të rinjve, studentëve dhe gjimnazistëve. Sipas përfaqësueses së opozitës, padia penale është drejtuar ndaj disa prej zyrtarëve më të lartë të sigurisë në vend, përfshirë Ministrin e Brendshëm, Drejtorin e Përgjithshëm të Policisë së Shtetit, drejtorin vendor të Policisë së Tiranës, drejtuesin e Agjencisë së Mbikëqyrjes Policore, si dhe drejtuesit e komisariateve nr. 1, 2, 3, 4 dhe 6 në kryeqytet. Kallëzimi përfshin gjithashtu çdo person tjetër të paidentifikuar që dyshohet se ka ushtruar dhunë fizike ndaj protestuesve dhe gazetarëve, qoftë gjatë tubimit, gjatë shoqërimit, apo brenda mjediseve të komisariateve. Në dokumentin e dorëzuar në organin e akuzës, veprat penale për të cilat kërkohet hetim përfshijnë “Vrasje e mbetur në tentativë”, “Heqja e paligjshme e lirisë”, “Kryerja e veprimeve arbitrare”, “Mosmarrja e masave për të ndërprerë veprimet e paligjshme”, “Shkelja e barazisë së shtetasve”, “Pengimi në të drejtën për t’u shprehur, grumbulluar apo manifestuar”, “Veprime që pengojnë zbardhjen e së vërtetës”, si dhe “Përdorimi i dhunës gjatë hetimeve”, të gjitha këto të kryera në bashkëpunim. Kalaja vuri në dukje mungesën e reagimit institucional, duke denoncuar faktin se pavarësisht pamjeve të transmetuara gjerësisht në media që shfaqin dhunën ndaj të rinjve, deri më tani nuk ka pasur asnjë nisje të hetimeve kryesisht nga ana e autoriteteve, ndërsa shtoi se ende nuk është ndërmarrë asnjë hap hetimor as për kallëzimin e mëparshëm të dorëzuar më 14 tetor. Po ashtu, ajo bëri me dije se Partia Demokratike ka zyrtarizuar edhe një kallëzim shtesë penal, kësaj radhe kundër kryeministrit Edi Rama, duke e akuzuar për veprat penale “gjenocide ndaj popullatës” dhe “ushtrim i ndikimit të paligjshëm ndaj zyrtarëve që kryejnë një funksion publik”. Në mbyllje të fjalës së saj, përfaqësuesja e opozitës u bëri thirrje organeve të drejtësisë që të tregojnë integritet dhe kurajon e nevojshme për të nisur hetimet kryesisht për dhunën e ushtruar ndaj të rinjve, si dhe për të shqyrtuar me seriozitet kallëzimet e dorëzuara nga selia blu.