Van Gaal lëshon akuza të forta ndaj UEFA-s: Formati i ri i Championsit është thjesht biznes dhe korrupsion

Ish-trajneri i njohur holandez, Louis van Gaal, ka hedhur akuza të ashpra në drejtim të shtëpisë evropiane të futbollit, UEFA, lidhur me strukturën e re të Ligës së Kampionëve. Ai e ka cilësuar këtë ndryshim si një vendim që i jep përparësi fitimeve materiale, duke anashkaluar krejtësisht vlerat dhe cilësinë e mirëfilltë sportive. Strategu i dikurshëm i gjigantëve evropianë si Ajaxi, Barcelona, Bayern Munichu dhe Manchester Unitedi, vlerëson se zgjerimi i numrit të pjesëmarrësve ka ulur ndjeshëm nivelin e konkurrencës, për shkak të hendekut të madh mes skuadrave. Në një prononcim për televizionin holandez “NOS”, Van Gaal u shpreh pa doreza: “Është qesharake që UEFA e krijon një format të tillë të garës. Sot mund të marrë pjesë kushdo. UEFA mendon vetëm për të fituar para. Është një botë e korruptuar”. Që nga edicioni 2024/25, Liga e Kampionëve funksionon me një sistem të ri prej 36 skuadrash në një tabelë të vetme, ku çdo ekip zhvillon tetë ndeshje në fazën e parë, duke zëvendësuar formatin e deritanishëm me grupe dhe gjashtë ndeshje. Për holandezin, ky zgjerim ka prodhuar vetëm pabarazi mes klubeve dhe nuk ka sjellë spektaklin e premtuar në fushën e gjelbër. “Quhet Liga e Kampionëve, apo jo? Aty duhet të marrin pjesë skuadrat më të mira. Kështu do të kishte më pak dallime në nivel dhe më pak gola, por ndeshjet do të ishin më cilësore dhe futbolli shumë më i mirë”, argumentoi ai, teksa propozoi një ndarje të ekipeve sipas niveleve, ngjashëm me modelin që aplikohet në hokejin mbi akull. Përveç cilësisë, Van Gaal ka ngritur alarmin edhe për ngarkesën e tepruar fizike të futbollistëve, e cila vjen si pasojë e kalendarit të mbingarkuar me ndeshje shtesë. Ai zbuloi se një vizion të ngjashëm për organizimin e garave ia kishte dorëzuar UEFA-s dy dekada më parë, por propozimet e tij kishin rënë në vesh të shurdhër. “Duke i ndarë të gjitha sipas nivelit. Kështu funksionon në gjithë botën e futbollit, përveçse në nivelet më të larta”, përfundoi ai, duke insistuar se ky organizim do të rriste rivalitetin dhe do të mbronte lojtarët nga dëmtimet e shpeshta.