Tensione dhe përplasje te PSG: Menaxhimi i Luis Enriques për Ousmane Dembele shkakton polemika

Paris Saint-Germain po kalon një periudhë delikate, teksa ekipi duhet të bëjë llogaritë pa shërbimet e Ousmane Dembele për rreth një muaj, për shkak të një tërheqjeje muskulore në kofshën e majtë. Ndërkohë që situata e Kvaratskhelias paraqitet më e rëndë, pasi rrezikon të mungojë deri në fund të sezonit, dëmtimi i francezit është më i lehtë, por ka ndezur debate të forta rreth mënyrës se si po menaxhohet nga stafi teknik. Në qendër të kësaj çështjeje është qasja e trajnerit Luis Enrique, i cili përpiqet ta ruajë sulmuesin nga problemet e mundshme fizike përmes një rotacioni të kujdesshëm. Megjithatë, kjo strategji ka sjellë paradoksalisht pakënaqësi te numri 10 i parizienëve, i cili beson se pushimi i tepërt e dëmton ritmin e tij të lojës dhe nuk i lejon të ruajë vazhdimësinë atletike në moshën 29-vjeçare. Statistikat tregojnë se Dembele ka humbur dy nga shtatë ndeshjet e kampionatit dhe ka nisur vetëm tri herë si titullar, një qasje e ngjashme me atë të sezonit të kaluar. Strategjia e teknikut spanjoll synon t'i mbrojë lojtarët nga dëmtimet që dikur i kishin kushtuar shtrenjtë sulmuesit gjatë periudhës te Barcelona, aq më tepër që vetë lojtari ka përmirësuar ndjeshëm stilin e jetës jashtë fushës për të shmangur lëndimet. Pavarësisht kësaj, javët e fundit pauzat e shpeshta nuk janë mirëpritur nga futbollisti. Batutat para kamerave mes trajnerit dhe lojtarit duket se kanë mbuluar një tension real në prapaskena, një hipotezë kjo që gjen mbështetje edhe te dëmtimi i pësuar të martën ndaj Barcelonës pas vetëm 20 minutash lojë. Sulmuesi nuk dëshiron të qëndrojë kaq shpesh në stol apo jashtë fushës. Nga ana e tij, Luis Enrique mbron filozofinë e tij të një rotacioni të gjerë, me synimin për t'i mbajtur të gjithë lojtarët të freskët dhe në kulmin e formës gjatë muajve të pranverës, periudhë kjo ku vendoset fati i sezonit. Champions League mbetet objektivi kryesor i klubit francez, i cili synon suksesin maksimal. Mungesa e parashikuar e Dembeles për rreth tri javë, e cila mund të zgjatet në një muaj duke llogaritur edhe ndeshjet e kombëtareve, këtë herë nuk vjen si pasojë e një pushimi të sforcuar, por prej një nevoje reale mjekësore.