Nico Paz magjeps Argjentinën: Talenti i Comos dhe pasardhësi i mundshëm i Messit po afron me kombëtaren

Argjentina ka vënë në qendër të vëmendjes Nico Paz, sulmuesin e talentuar të Comos, skuadër e drejtuar nga Cesc Fabregas. 22-vjeçari bëri bujë të madhe së fundmi me paraqitjen e tij fantastike kundër Manchester United, ku la shenjë duke shënuar dy gola mbresëlënës dhe duke dhuruar një asistim perfekt. "Paz po shkëlqen në kontinentin e vjetër me fanellën numër 10, një numër që aktualisht ka nevojë për një zotërues të ri në kombëtare", shkruajnë mediat argjentinase. Sipas tyre, lojtari i ri pritet të kthehet në një element kyç për rifreskimin e përfaqësueses bardhekaltër, e cila udhëhiqet nga trajneri Lionel Scaloni. Forma e tij e lartë ka ndezur sërish paralelizmat me Lionel Messin, ku Paz shihet si trashëgimtari i tij i ardhshëm. "Ai vizatoi me këmbën e majtë një goditje harku që të sjell ndërmend shumë prej perlave të Lionel Messit", thekson e përditshmja e njohur “Clarín”. Pavarësisht ngjashmërive, analistët në Argjentinë theksojnë edhe dallimet taktike mes tyre, duke vënë në dukje se ndërsa Messi zotëron aftësinë të operojë në hapësira tejet të ngushta, Paz kërkon më shumë hapësirë dhe liri në fushë për të shfaqur aftësitë e tij të plota. "Megjithatë, ajo që i bashkon mbetet klasa e pastër dhe cilësia e lartë teknike", përfundojnë opinionistët argjentinas.