Ivan Balliu dhe bashkëlojtarët drejt një vendimi të paprecedentë në Spanjë, tension i lartë te Rayo Vallecano

Përballja e së shtunës mes Rayo Vallecanos dhe Elches, e cila është caktuar të nisë në ora 14:00, rrezikon të përfshihet nga tensionet dhe protestat e ashpra të tifozëve kundër presidentit të klubit, Raul Martin Presa. Mbështetësit e skuadrës nga Madridi kanë thurur një plan unik për të shprehur pakënaqësinë e tyre. Ata synojnë të hedhin në tapetin e gjelbër mijëra karta abonimi që mbajnë portretin e numrit një të klubit, si dhe rreth 8500 topa plastikë fëmijësh. Në një situatë kaq delikate, lojtarët e Rayos, mes të cilëve bën pjesë edhe mbrojtësi i kombëtares shqiptare, Ivan Balliu, pritet të ndërmarrin një hap solidarizues duke refuzuar të luajnë gjatë minutës së parë të takimit në shenjë proteste. Përplasja mes tifozërisë dhe drejtoreshës së klubit ka arritur kulmin, ndërsa autoritetet nuk përjashtojnë as mundësinë e një skenari ku tifozët të futen masivisht në fushën e lojës. Vlen të theksohet se klubi tashmë është ndëshkuar nga organet kompetente me një gjobë prej 6 mijë eurosh, si dhe me mbyllje të pjesshme të stadiumit, si pasojë e incidenteve dhe ndërprerjes së ndeshjes së kaluar në shtëpi kundër Athletic Bilbaos. Sfida e radhës e 24 tetorit pritet të sjellë sërish tension në shkallët e stadiumit të Rayos, ku Balliu me shokë rrezikojnë të përballen me një situatë krejtësisht të pazakontë. Kujtojmë se ndeshja e mëparshme ndaj Bilbaos u ndërpre pasi tifozët hodhën në fushë avionë letre dhe topa plastikë.