“Bojkotoni klubet e natës” – Reperi Stresi lëshon thirrjen e fortë dhe kritikon ashpër kolegët e estradës

Reperi i njohur, Arkimed Lushaj, i njohur me emrin e artit Stresi, ka ndërmarrë një hap të ri përmes rrjeteve sociale, duke u bërë thirrje qytetarëve që të ndërmarrin një bojkot masiv këtë të shtunë ndaj të gjitha lokaleve të natës. Nëpërmjet një video-mesazhi të shpërndarë në profilin e tij në Instagram, ku shihet qartë prania e qytetarëve të mbledhur në protestë, artisti ka shprehur zhgënjimin e tij të thellë ndaj figurave publike dhe kolegëve të tij të skenës për mungesën e solidaritetit dhe angazhimit në terren. “Grekë janë, s’janë shqiptarë! Ndaj të shtunën, meqë jemi pushim, të gjithë bojkotoni klubet e natës. Asnjë nga VIP-at që këndojnë nuk janë në terren me ne, kështu që të shtunën të gjithë bashkë”, ka shkruar ai në mesazhin e tij publik. Përmes këtij apelit, Stresi synon që qytetarët të refuzojnë mbrëmjet muzikore dhe ambientet ku performojnë artistët shqiptarë, si një formë ndëshkimi dhe pakënaqësie ndaj qëndrimit indiferent të tyre karshi kauzave shoqërore që ai po mbështet. Tani mbetet për t'u parë nëse kjo nismë e ndërmarrë nga reperi do të gjejë mbështetjen e gjerë të masës dhe nëse do të ketë ndonjë reagim zyrtar nga emrat e njohur të muzikës që u vunë në shënjestër të kritikave të tij.