Zvarritja e punimeve në Teatrin Kombëtar, Përparim Rama lëshon kritika të ashpra

Kryetari i Komunës së Prishtinës, Përparim Rama, ka shprehur pakënaqësinë e tij lidhur me ecurinë e punimeve për renovimin e Teatrit Kombëtar të Kosovës, duke vënë në dukje se kjo ndërtesë emblematike në zemër të kryeqytetit po i nënshtrohet ndërhyrjeve prej pesë vitesh. Nëpërmjet një reagimi publik, i pari i Prishtinës ka ngritur shqetësime serioze për dinamikën dhe mënyrën e zhvillimit të këtij projekti, duke e vënë theksin te ajo që ai e ka cilësuar si “mbindërtim”. Po ashtu, Rama ka drejtuar akuza edhe ndaj Institutit të Kosovës për Mbrojtjen e Monumenteve (IKMM), duke aluduar se ky institucion po pengon zhvillimin e nismave infrastrukturore në kryeqytet me pretekstin e ruajtjes së trashëgimisë kulturore.