Kurti nga Shën Stefani: Kosova e gatshme për statusin e vendit kandidat në Bashkimin Evropian

Kryeministri i Kosovës, Albin Kurti, ka zhvilluar një takim zyrtar me Kancelarin Federal të Austrisë, Christian Stocker, në Shën Stefan, ku në qendër të bisedimeve kanë qenë synimet e ekzekutivit për mandatin e ri qeverisëse dhe forcimi i mëtutjeshëm i raporteve bilaterale mes dy vendeve. Përmes një reagimi në rrjetet sociale, kreu i ekzekutivit kosovar ka bërë të ditur se është diskutuar gjerësisht mbi mundësitë e zgjerimit të bashkëpunimit ekonomik, me theks të veçantë te sektorët e energjisë, transportit hekurudhor dhe teknologjisë digjitale, fusha këto ku investimet nga korporatat austriake dhe diaspora jonë po shënojnë rritje të vazhdueshme. "Në Vjenë u takuam vetëm dy ditë pas zgjedhjeve të parakohshme parlamentare të 7 Qershorit, ndërsa këtë mëngjes në Shën Stefan në detin Adriatik biseda me Kancelarin Federal të Austrisë, Christian Stocker, u përqendrua në prioritetet e Qeverisë në mandatin e ri dhe avancimin e mëtejmë të marrëdhënieve dypalëshe," ka shkruar ndër të tjera Kurti. Ai ka vënë në pah se gjatë takimit janë trajtuar edhe mundësitë konkrete të bashkëpunimit ekonomik në fusha strategjike si energjia, hekurudhat dhe teknologjia digjitale, segmente në të cilat bizneset austriake dhe mërgata po kontribuojnë çdo ditë e më shumë përmes investimeve të tyre. Duke u ndalur te proceset integruese, shefi i qeverisë përmendi hapat e ndërmarrë nga Prishtina zyrtare: "Para katër muajsh mes tjerash folëm për dy hapa konkretë: integrimin në SEPA dhe zonën roaming të BE-së. Për të parin tashmë kemi përmbushur edhe kushtin e fundit, me tërësinë e ligjeve të nevojshme, dhe për të dytin presim nisjen e negociatave së shpejti." Në këtë kontekst, Kurti theksoi se e mbështet fuqimisht qëndrimin e Kancelarit Stocker se Bashkimi Evropian nuk mund të konsiderohet i plotë, i sigurt dhe i qëndrueshëm pa përfshirjen e Ballkanit Perëndimor, dhe se të gjithë shtetet aspirante duhet të trajtohen në mënyrë të barabartë bazuar në parimin e meritokracisë. "Në bazë të meritës, Republika e Kosovës është gati për avancim në rrugën evropiane, statusin e vendit kandidat dhe hapjen e negociatave," ka shtuar ai, duke e mbyllur mesazhin e tij me një ton sportiv rreth vizitave dhe ndeshjeve të zhvilluara: "Pas 3:1 në Vjenë dhe 1:1 në Prishtinë, po afrohemi edhe në futboll."