Skandali i mishit nga Brazili, ministri Muja: Kontroll total për çdo dërgesë pas dyshimeve për etiketa të falsifikuara

Ministri i Bujqësisë, Armend Muja, ka njoftuar se institucionet kompetente kanë vendosur një sistem kontrolli prej 100 për qind për çdo dërgesë të mishit që vjen nga Brazili. Ky vendim ka ardhur si pasojë e dyshimeve serioze për parregullsi dhe ndryshim të etiketave të afatit të skadimit në produktet e mishit të destinuara për tregun e Kosovës. Në lidhje me këtë çështje, deputetja e Aleancës, Time Kadrijaj, ka ngritur alarmin gjatë diskutimeve, duke shprehur shqetësimin e saj të thellë për shkallën e sigurisë ushqimore dhe mbrojtjen e shëndetit të qytetarëve. Duke trajtuar rastin e bllokimit të sasisë së mishit nga autoritetet malazeze në Portin e Tivarit, ministri Muja sqaroi se institucionet e Kosovës i kanë shtrënguar masat e sigurisë dhe po bëjnë verifikimin e detajuar të të gjitha importeve braziliane. “Kemi vendosur 100% kontroll të dërgesave të mishit nga Brazili në saje të lajmërimit të Bashkimit Evropian që Brazili do të hiqet nga lista e establishmentëve të aprovuara. Më 29 shtator, ne kemi pranuar informacionet e para të cilat konfirmojnë dyshimet që i kanë autoritetet se në këto disa dërgesa ka pasur ose ka dyshime për ndërrim të etiketave. Deri më tani, këtë informacion e kemi nga autoritetet e Malit të Zi. Megjithatë, unë dëshiroj t’ju informoj që paralelisht dhe pa marrë parasysh veprimet e Malit të Zi e raportin zyrtar për të cilin po e presim zyrtarisht, që nga shtatori kemi urdhëruar 100% kontroll të çdo dërgese. Që nga shtatori ka kontrolle më të intensifikuara, ndoshta më të mëdha, ndonjëherë brenda tregut. Gjithashtu, është nisur kontroll-verifikimi prej janarit deri më 5 shtator i çdo dërgese. 1,446 dërgesa të mishit nga Brazili janë duke u verifikuar një nga një. Inspektohet çdo operator ekonomik; operatori Apetit është një nga operatorët e mëdhenj, por 60% e importeve nga operatorë të tjerë dhe ato po verifikohen një nga një”, deklaroi Muja. Në ballafaqimin e tyre, deputetja e Aleancës, Time Kadrijaj, kërkoi llogaridhënie dhe përgjigje të qarta rreth rrezikut të drejtpërdrejtë që mund t’u kanoset konsumatorëve nga konsumimi i produkteve me afat të kaluar. “Nuk duhet që të helmohet popullata. A do ta fusnin në listën e zezë kompaninë Apetit? Po bleni mish me afat të skaduar që të helmoni popullatën”, u shpreh Kadrijaj. Kujtojmë se autoritetet në Mali të Zi kanë ndaluar në dy raste të ndryshme rreth 103 tonë mish viçi të ngrirë, i cili kishte për cak kompaninë kosovare “Apetit SHPK”. Sipas raporteve zyrtare të tyre, ngarkesa kishte kaluar afatin e përdorimit, ndërsa në dërgesën e parë kishte dyshime të forta se ambalazhi dhe etiketat origjinale ishin zëvendësuar në mënyrë të paligjshme.