Goditje e fuqishme ndaj kontrabandës në veri: Përfshihet AKI-ja, sekuestrohen mbi 22 automjete dhe mallra në vlerë mbi 200 mijë euro

Një operacion i gjerë kundër kontrabandës është zhvilluar në pjesën veriore të vendit, ku Prokuroria Themelore në Mitrovicë, në bashkëpunim të ngushtë me Policinë e Kosovës, Doganën dhe Agjencinë e Kosovës për Inteligjencë (AKI), ka ndërmarrë mbi 20 aksione për të luftuar futjen ilegale të mallrave nga Serbia nëpërmjet rrugëve malore. Sipas komunikatës zyrtare të Prokurorisë, ky operacion hetimor ka nisur në prill të vitit 2026. Gjatë kësaj periudhe, autoritetet kanë sekuestruar më shumë se 22 automjete, ndërsa vlera e mallrave të kapura kalon shifrën e 200 mijë eurove, pa llogaritur këtu taksat dhe detyrimet e tjera doganore. Ndërhyrjet në terren janë kryer gjatë muajit maj deri në shtator, si dhe në kuadër të një aksioni të zhvilluar sot, duke përfshirë zonat kufitare dhe vendbanimet në komunat Zubin Potok, Zveçan, Leposaviq dhe Mitrovicë e Veriut. Organet e rendit kanë bërë të ditur se hetimet janë mbështetur në masa të veçanta, të urdhëruara nga Prokurori i Shtetit që nga data 24 prill 2026. Këto veprime kanë mundësuar zbulimin e rrugëve alternative të përdorura për kontrabandë, identifikimin e personave dhe automjeteve të dyshimta, si dhe lokacionet ku mallrat shkarkoheshin, magazinoheshin dhe më pas shpërndaheshin. Hetimet kanë zbuluar se automjetet e përdorura për këtë aktivitet ilegal ishin kryesisht të modifikuara, duke u hequr ulëset e pasme për të krijuar hapësirë për mallra. Në momentet kur drejtuesit e tyre vërenin praninë e forcave policore, ata i braktisnin mjetet dhe largoheshin nga vendngjarja. Në mesin e mallrave të sekuestruara dominojnë produktet ushqimore, pijet alkoolike dhe joalkoolike, pijet energjike, cigaret, barnat pa banderola, artikujt e higjienës dhe tekstilet. Po ashtu, janë konfiskuar edhe veshje me marka të mbrojtura tregtare, për të cilat nuk posedohej asnjë lloj licence apo autorizimi përkatës. Një rast specifik ka qenë ai i zbulimit të 504 shpezëve të gjalla, të cilat nuk kishin asnjë dokumentacion mbi origjinën dhe as certifikatë shëndetësore. Me urdhër të inspektorit veterinar, i gjithë ky lot është asgjësuar menjëherë për shkak të rrezikut të drejtpërdrejtë që paraqiste për shëndetin e qytetarëve. Prokuroria ka theksuar se synimi kryesor i këtij operacioni është ndalimi i qarkullimit të mallrave që shmangin procedurat e importit dhe zhdoganimit, veçanërisht ushqimeve dhe ilaçeve, për të cilat nuk ekzistojnë garanci për origjinën, kushtet e ruajtjes, transportin apo afatin e skadencës. Aktualisht, ky rast po trajtohet nën dyshimet për kryerjen e veprave penale “Kontrabandimi i mallrave”, nga neni 311, dhe “Tregtia e ndaluar”, nga neni 299 i Kodit Penal të Kosovës. Personat e përfshirë janë identifikuar tashmë dhe procedurat penale ndaj tyre po vazhdojnë. Nga Prokuroria bëhet e ditur se hetimet kanë hyrë në fazën e tyre përfundimtare. Pas analizimit të plotë të provave të siguruara, Prokurori i Shtetit do të ndërmarrë hapat dhe vendimet e duhura ligjore brenda afateve të përcaktuara.