Tregjet energjetike në alarm: Çmimet e naftës shënojnë rritje pas sulmit me dron në Arabinë Saudite

Kuotat e naftës në tregjet ndërkombëtare kanë regjistruar një rritje prej më shumë se 2 për qind. Ky ndryshim i menjëhershëm erdhi si pasojë e një sulmi me dron që kishte në shënjestër fushën naftëmbajtëse Shaybah, e cila menaxhohet nga gjiganti shtetëror saudit “Aramco”, duke rikthyer frikën për bllokim të mundshëm të rrjedhës së energjisë. Referenca globale e naftës së papërpunuar, Brent, ka arritur vlerën e 111,40 dollarëve për fuçi, duke shënuar një ngjitje prej 2,4 për qind. Nga ana tjetër, nafta referencë në Shtetet e Bashkuara, West Texas Intermediate (WTI), ka pësuar një rritje prej 2,22 për qind, duke u kuotuar në kuotën e 99,30 dollarëve për fuçi. Incidenti tragjik, ku mbetën të vrarë dy persona, ka ringjallur pikëpyetjet e sigurisë rreth objekteve kyçe energjetike në rajonin e Lindjes së Mesme, duke shërbyer si shtysë për rikuperimin e vlerës së arit të zi pas rënieve që ishin shënuar më parë. Si masë paraprake ndaj situatës së tensionuar, autoritetet amerikane kanë lëshuar urdhër largimi për një pjesë të stafit diplomatik dhe familjarët e tyre të vendosur në misionet në Arabinë Saudite, duke reflektuar shqetësimin në rritje për stabilitetin rajonal. Në një zhvillim paralel, tensionet globale janë ushqyer edhe nga sulmet e njëpasnjëshme me dronë të ndërmarra nga Ukraina gjatë kësaj jave kundër impianteve të naftës në Rusi, duke e bërë edhe më të paqartë të ardhmen e furnizimit të tregut global me energji.