Tragjedia e pacientes me kancer, deputetja e LDK-së kërkon hetim urgjent nga prokuroria për mungesën e barnave

Deputetja e Lidhjes Demokratike të Kosovës (LDK), Janina Ymeri, ka adresuar kritika të ashpra ndaj Ministrisë së Shëndetësisë, pas ndarjes nga jeta të një pacienteje e cila, sipas shoqatës së pacientëve me kancer “Renesansa”, kishte mbetur pa marrë medikamentin jetik Palbociclib për rreth katër muaj. Gjatë fjalës së saj, ligjvënësja Ymeri ka ngritur alarmin edhe lidhur me statistikat shqetësuese, duke përmendur një rritje të ndjeshme të numrit të viktimave dhe të rasteve të reja me sëmundje tumorale në vend. Ajo ka komentuar gjithashtu reagimin zyrtar të lëshuar nga Klinika e Onkologjisë në Qendrën Klinike Universitare të Kosovës (QKUK), duke theksuar se vetë shpjegimi i institucioneve rreth funksionit të barit dëshmon rolin kyç që ka kjo terapi në frenimin e avancimit të sëmundjes. “Nga reagimi, njëkohësisht edhe i QKUK-së, është e kuptueshme: barnat e gjeneratës së re, përfshirë Palbociclibin, janë terapi mbështetëse që synojnë ta ngadalësojnë përparimin e sëmundjes. Por kjo është esenca: ka pasur një ngadalësim të përparimit të sëmundjes dhe, në mungesë të këtij hapi, nuk ka ndodhur një gjë e tillë. Pastaj, e njoh rastin dhe po përballet me sëmundjen për herë të dytë. A ka rëndësi kur dikush përballet me sëmundjen për herë të parë, kur dikush përballet me sëmundjen për herë të dytë, kur dikush i ka tre muaj pa hapa, edhe kur dikush i ka katër muaj pa hapa? Tani, ministër, meqenëse je këtu, jo se Albin Kurti nuk është më përgjegjës se ti; ai sigurisht që është më përgjegjës. Nuk e di qysh fle natën, kur dikush qan se e ka kancerin, e ju e rregulloni një mendilin. A e ke idenë që, për gjashtë vitet e fundit, ka pasur rritje prej 30 për qind të vdekjeve në spitalet rajonale dhe në QKUK? Mbi 42 për qind janë rritur rastet e reja me tumor”, ka deklaruar Ymeri.