Start fantastik në NBA: Doncic udhëheq Lakers drejt triumfit të thellë ndaj Warriors në startin e epokës së re

Los Angeles Lakers e ka nisur në mënyrën më fantastike edicionin e ri në NBA, duke korrur një fitore bindëse me shifrat 127-105 përballë Golden State Warriors. Personazhi kryesor i këtij triumfi ishte ylli slloven, Luka Doncic. Në ndeshjen hapëse të këtij sezoni, Doncic udhëhoqi kalifornianët me një paraqitje të shkëlqyer prej 28 pikësh dhe shtatë asistimesh. Para fillimit të takimit, ai kishte paralajmëruar hapjen e një kapitulli të ri për skuadrën nga Los Angelesi, gjë të cilën e konfirmoi plotësisht me nivelin e lartë të lojës në parket. Çereku i parë u karakterizua nga një duel mjaft i fortë mes dy liderëve të skuadrave, Luka Doncic dhe Stephen Curry. Slloveni realizoi 13 pikë që në minutat e para, ndërsa Curry iu përgjigj me 16 pikë, duke i mbajtur në lojë basketbollistët e Golden State. Kthesa e madhe erdhi në çerekun e dytë, ku Lakers nisën shkëputjen e rezultatit. Përveç Doncic, në skenë doli edhe Walter Kessler, i cili zhvilloi një ndeshje perfekte duke shënuar 26 pikë me saktësi 100% nga loja (12 goditje të sakta nga 12 tentativa). Mbrëmja u zbukurua akoma më shumë nga një realizim i jashtëzakonshëm i Doncic për tri pikë gati nga mesi i fushës, çka ngriti peshë të gjithë publikun. Në anën tjetër, ndonëse Curry e mbylli pjesën e parë me 20 pikë, Warriors pësuan rënie të dukshme në efikasitetin sulmues. Dominimi i Lakers u vulos përfundimisht në çerekun e tretë, kur avantazhi i tyre arriti deri në 34 pikë (102-68). Krahas dyshes Doncic-Kessler, një kontribut të çmueshëm dha edhe Austin Reaves me 23 pikë e gjashtë asistime. Curry mbeti më i dalluari te Golden State me 23 pikë në total, por pa mundur të shmangë humbjen e thellë. Në minutat e fundit të takimit, publiku përshëndeti me duartrokitje hyrjen në parket të Bronny James, djalit të LeBron James, ndërsa treshja e re e Lakers – Doncic, Reaves dhe Kessler – e mbylli këtë sfidë me një bilanc mbresëlënës prej 77 pikësh të shënuara së bashku.