Kuvendi nën presion: Protesta hyn në ditën e 10-të, sot seancë maratonë me interpelanca urgjente

Kuvendi i Shqipërisë mblidhet sot në orën 10:00 në një seancë plenare, e cila përkon me ditën e dhjetë të revoltës së të rinjve. Axhenda parlamentare parashikon një sërë zhvillimesh të rëndësishme, duke nisur nga interpelancat me kabinetin qeveritar e deri te shqyrtimi i nismave të ndryshme ligjore dhe reformave territoriale. Në qendër të vëmendjes do të jetë interpelanca urgjente me ministrin e Punëve të Brendshme, Ervin Demo, kërkesë kjo e iniciuar nga një grup deputetësh të Partisë Demokratike. Krahas kësaj, ministri i Infrastrukturës dhe Energjisë, Enea Karakaçi, do të përballet me dy interpelanca të kërkuara nga ligjvënësit Ermal Pacaj dhe Tedi Blushi. Po ashtu, ministri i Financave, Petrit Malaj, do t'i përgjigjet interpelancës së kërkuar nga deputeti Tedi Blushi. Seanca do të vijojë me shqyrtimin e një pakete projektligjesh me ndikim thelbësor. Ndër to spikasin ratifikimi i Konventës së Këshillit të Evropës për Mbrojtjen e Profesionit të Avokatit, marrëveshja me Maqedoninë e Veriut për pikat e përbashkëta të kalimit kufitar dhe kontrollet e integruara, si dhe amendamentet në ligjin për shërbimet e pagesave. Gjithashtu, deputetët do të debatojnë për projektligje të tjera të rëndësishme, siç është ai për parandalimin e pastrimit të parave dhe financimit të terrorizmit, ndryshimet në ligjin për të drejtat e autorit, si dhe rregullimet ligjore për treguesit gjeografikë të produkteve artizanale dhe industriale. Një pikë kyçe e rendit të ditës është edhe votimi për ngritjen e Komisionit të Posaçëm Parlamentar, i cili do të mbikëqyrë fazën e dytë të Reformës Administrativo-Territoriale në vend.