Tensionet në Tiranë: Studentët ‘rrethojnë’ Kuvendin, nis seanca plenare me 14 çështje në rend dite

Kuvendi i Shqipërisë rikthehet sot, më 22 tetor, në jetën parlamentare, ndërsa vëmendja është zhvendosur te protesta e paralajmëruar e studentëve. Në orën 10:00, kur është parashikuar nisja e seancës plenare, pritet që para godinës së Parlamentit të mblidhen grupe protestuesish, duke detyruar autoritetet të ndërmarrin masa të rrepta sigurie. Kjo seancë vjen pas një ndërprerjeje të detyruar, pasi mbledhja e kaluar u anulua me urdhër të kryeparlamentarit Niko Peleshi për shkak të situatës së tensionuar në vend. Në prag të fillimit të punimeve, forcat e rendit kanë nisur instalimin e gardheve metalike për të garantuar sigurinë dhe për të krijuar një perimetër të sigurt, duke shmangur çdo tentativë të mundshme të protestuesve për të hyrë në ambientet e brendshme të institucionit. Rendi i ditës për këtë të enjte është mjaft i ngjeshur, me 14 pika të përcaktuara për diskutim. Fillimisht, deputetët do të miratojnë procesverbalin e seancës së 8 tetorit, e cila nuk u mbajt për shkak të anulimit. Më pas, fokusi do të zhvendoset te katër interpelancat e kërkuara me ministra të kabinetit qeveritar. Në sallën e Kuvendit, ministri i Punëve të Brendshme, Ervin Demo, do të përballet me një interpelancë urgjente të kërkuar nga Partia Demokratike. Gjithashtu, ministri i Infrastrukturës dhe Energjisë, Enea Karakaçi, do t’i përgjigjet pyetjeve të deputetëve Ermal Pacaj dhe Tedi Blushi në dy interpelanca të ndara, ndërsa ministri i Financave, Petrit Malaj, do të jetë në interpelancë me deputetin Tedi Blushi. Pjesa e dytë e seancës do t’i kushtohet shqyrtimit të një sërë projektligjesh të rëndësishme, përfshirë ato për drejtësinë, shërbimet e pagesave dhe masat kundër pastrimit të parave e financimit të terrorizmit. Në agjendë janë edhe ratifikimi i Konventës së Këshillit të Evropës për mbrojtjen e profesionit të avokatit, si dhe marrëveshja me Maqedoninë e Veriut për pikat e përbashkëta kufitare. Seanca do të vijojë me diskutime mbi ligjin për të drejtat e autorit dhe projektligjin për treguesit gjeografikë të produkteve artizanale. Një ndër pikat kryesore të ditës mbetet votimi për ngritjen e Komisionit të Posaçëm Parlamentar, i cili do të merret me fazën e dytë të Reformës Administrativo-Territoriale në vend.