Kthimi nga SHBA: Edi Rama fluturon drejt Rinasit për një mesazh urgjent pas lëvizjeve në krye të SHISH

Kryeministri i Shqipërisë, Edi Rama, do t'i drejtohet publikut me një deklaratë të rëndësishme nga mjediset e sallës së shtypit në Aeroportin Ndërkombëtar “Nënë Tereza”, menjëherë pas mbërritjes së tij nga Shtetet e Bashkuara të Amerikës. Fokusi kryesor i fjalës së kreut të qeverisë pritet të jetë situata politike dhe institucionale në vend, e cila vjen nën hijen e zhvillimeve të fundit dhe nisjes së hetimeve nga SPAK ndaj ish-drejtores së SHISH, Vlora Hyseni, e cila aktualisht ndodhet në masën e sigurisë “arrest shtëpie”. Kujtojmë se pas nisjes së këtyre hetimeve, Rama reagoi menjëherë nga Nju Jorku duke e shkarkuar atë nga detyra. Ai deklaroi se pas kthimit në Tregun Shqiptar dhe në bashkëpunim të ngushtë me Presidentin Bajram Begaj, do të përzgjidhet drejtuesi i ri i Shërbimit Informativ të Shtetit. Ndërkohë, institucioni i Presidencës është vënë në lëvizje. Për ditën e nesërme, Presidenti i Republikës, Bajram Begaj, ka thirrur mbledhjen e Këshillit të Sigurimit Kombëtar. Ky hap vjen pas një sërë takimesh paraprake që kreu i shtetit zhvilloi gjatë javës së kaluar me drejtorin e komanduar të SHISH, drejtorin e përgjithshëm të Policisë së Shtetit dhe ministrin e Brendshëm. Këto zhvillime pasojnë përmbylljen e vizitës gjashtëditore të kryeministrit Rama në SHBA, ku ai mori pjesë aktive në punimet e sesionit të 81-të të Asamblesë së Përgjithshme të Kombeve të Bashkuara në Nju Jork. Agjenda e shefit të qeverisë tejkaloi diplomacinë zyrtare; ajo nisi me një bashkëbisedim me diasporën shqiptare në Michigan, ku ai bëri publike nismën për hapjen e një konsullate të re dhe ngritjen e Regjistrit Kombëtar të Diasporës. Më pas, në Nju Jork, Rama zhvilloi takime të tjera me bashkatdhetarë, ndërsa në fjalimin e mbajtur në podiumin e OKB-së trajtoi sfida globale si përdorimi i inteligjencës artificiale, perspektiva e integrimit europian të Shqipërisë dhe diplomacia ndërkombëtare e vendit.