Hajduku dënohet me 80 mijë euro nga UEFA

Hajduku i Splitit është dënuar nga UEFA pas incidenteve të shkaktuara nga tifozët e tij në ndeshjen ndaj Ajaxit, të zhvilluar më 15 tetor në stadiumin “Poljud”, në kuadër të xhiros së parë të Ligës së Konferencës. Skuadra kroate e kishte fituar takimin me rezultat 2:1, por festës së fitores i ka paraprirë një vendim disiplinor që do t’i shkaktojë pasoja klubit. Sipas njoftimit zyrtar të Hajdukut, UEFA ka vendosur që klubi ta zhvillojë pa praninë e tifozëve ndeshjen e xhiros së tretë të Ligës së Konferencës kundër Sint-Truidense. Përveç mbylljes së stadiumit, Hajduku është dënuar edhe me 80 mijë euro gjobë për shkak të ndërprerjes së ndeshjes si pasojë e përdorimit të mjeteve piroteknike. Gjithashtu, klubi kroat ka marrë edhe një dënim me kusht. Në rast se përsëriten incidente të njëjta ose të ngjashme me përdorimin e mjeteve piroteknike, UEFA mund të urdhërojë mbylljen e stadiumit në një nga ndeshjet e ardhshme evropiane. Një tjetër gjobë prej 16 mijë eurosh i është shqiptuar Hajdukut për shkak të shkallëve të bllokuara në tribunat e stadiumit. Pas vendimit, klubi u ka bërë thirrje tifozëve që të shmangin sjelljet e padëshiruara në ndeshjet e ardhshme evropiane, si në shtëpi ashtu edhe në udhëtime.