Jakup Krasniqi i thotë "jo" mjekëve në Hagë, familja shpreh alarm për shëndetin e tij

Ish-kryetari i Kuvendit të Kosovës, Jakup Krasniqi, i cili po mbahet në Hagë, ka ndërprerë çdo lloj komunikimi dhe pranimi të shërbimeve mjekësore nga institucionet atje. Lajmi është bërë i ditur nga vajza e tij, Gresa Krasniqi, e cila përmes një reagimi publik ka shprehur brengosjen e thellë për gjendjen shëndetësore të të atit pas një bisede telefonike që ka pasur me të. Gjatë kësaj bisede, ish-kreu i Kuvendit i ka komunikuar familjes se ka refuzuar kategorikisht një kontroll mjekësor nga stafi i qendrës së paraburgimit. Ky vendim, sipas saj, buron nga pakënaqësia e thellë që Krasniqi ka lidhur me trajtimin që po i rezervohet në këtë institucion ndërkombëtar. Vajza e tij ka theksuar se Jakup Krasniqi ndihet i trajtuar në mënyrë të padrejtë dhe i privuar nga të drejtat elementare. Për më tepër, ajo ka pranuar se kjo situatë e ka vënë familjen në një dilemë të madhe, pasi është jashtëzakonisht e vështirë ta bindësh atë që të kërkojë ndihmë shëndetësore nga një sistem ndaj të cilit tashmë ka humbur çdo lloj besimi. "Si mund t’i kërkoj të pranojë kujdesin e atyre institucioneve, kur ai ndihet i tradhtuar pikërisht nga drejtësia që duhej ta mbronte?", ka shkruar ajo, duke reflektuar ndjenjën e rëndë të pafuqisë përballë kësaj situate që po kalon familja, sidomos duke marrë parasysh moshën e babait të tyre dhe nevojën e tij të vazhdueshme për kujdes shëndetësor. Në mbyllje të reagimit të saj, Gresa ka adresuar edhe vendimin e ranë të Dhomave të Specializuara të Kosovës në Hagë – ku Krasniqi është dënuar me 25 vjet burgim – duke e cilësuar atë jo thjesht si një vendim të gabuar që mund të përmbyset, por si një padrejtësi të hapur. "Dënimi i Babit nuk është një gabim që pret të korrigjohet. Është një padrejtësi", ka përfunduar ajo, duke përcjellë një mesazh mbështetjeje: "Ne jemi këtu, Babi. Të duam të fortë, të duam të shëndetshëm".