Kritika të ashpra nga Rexhep Shahu: Edi Rama të ndalë ndikimet e huaja dhe t'i japë fund vjedhjeve gjigante në vend

Publicisti i njohur Rexhep Shahu ka adresuar akuza të forta ndaj kryeministrit Edi Rama, duke u ndalur te zhvillimet e fundit dhe situata e rënduar politike e ekonomike në Shqipëri. Sipas tij, qeverisja aktuale dhe papërgjegjshmëria institucionale janë shkaqet kryesore që po nxisin pakënaqësinë qytetare. Shahu i ka bërë thirrje kreut të qeverisë që të tregojë vendosmëri përballë çdo faktori të jashtëm që kërkon të destabilizojë vendin. “Preje dorën e huaj që destabilizon vendin Edi Rama. Preje dorën e huaj që po ta shkatërron dhe destabilizon Shqipërinë z. Rama. Preje dhe shpëtoje Shqipërinë dhe veten tende. Ose mos llomotit dokrra,” u shpreh ai, duke u bërë gjithashtu thirrje protestuesve që të heqin maskat dhe të mos lejojnë që tubimet të shndërrohen në instrumente frikësimi apo manipulimi. Në analizën e tij, publicisti ka theksuar nevojën urgjente për mbrojtjen e institucioneve diplomatike dhe objekteve të kultit, duke kërkuar reagim më të fortë nga shteti për garantimin e sigurisë së Vatikanit dhe ambasadës izraelite në Tiranë, si simbole dhe aleatë të rëndësishëm të popullit shqiptar dhe atij kosovar. Më tej, Shahu ka kritikuar trajtimin që pushteti i bën opozitës dhe protestave, duke vënë në dukje se pakënaqësia popullore ushqehet nga varfëria, korrupsioni i administratës dhe keqmenaxhimi i sektorëve kyç si shëndetësia dhe arsimi, e jo thjesht nga agjendat politike. Në përmbyllje të reagimit të tij, publicisti ka radhitur një listë me 28 çështje, afera dhe projekte madhore që i cilëson si abuzime financiare dhe dëme të rënda ndaj buxhetit të qytetarëve shqiptarë, ku përfshihen inceneratorët, koncesionet shëndetësore, Unaza e Madhe, çështjet e arbitrazheve ndërkombëtare dhe shpenzimet e pajustifikuara qeveritare.