Punimet në autostradën Ohër-Kërçovë drejt përfundimit, Nikolloski inspekton ecurinë në terren

Ministri i Transportit dhe Lidhjeve, Aleksandar Nikolloski, ka zhvilluar sot një inspektim nga afër të punimeve që po kryhen për ndërtimin e autostradës Ohër-Kërçovë. Përmes një postimi në rrjetet sociale, ai bëri të ditur se ky projekt infrastrukturor po ecën me ritme mjaft të larta dhe tashmë është në fazën e tij përfundimtare. “Në terren me punëtorët e zellshëm që po e ndërtojnë autostradën Ohër-Kërçovë. Përparim i shkëlqyer! Siç thotë populli ynë: ‘Shihet fundi’. Një autostradë e shpejtë, e sigurt dhe bashkëkohore, me tunelet më të gjata në Maqedoni, galeri dhe viadukte, është në horizont. Po e ndërtojmë Maqedoninë!”, ka deklaruar zëvendëskryeministri Nikolloski. Ky aks rrugor llogaritet si një nga investimet më madhore kapitale në vend, ndërsa pritet të transformojë qarkullimin dhe të lehtësojë ndjeshëm lidhjen ndërmjet rajonit jugperëndimor dhe qendrave të tjera të Maqedonisë së Veriut.