Përplasja për shportën e konsumit, Durmishi: Llogaritë e sindikatave janë më shumë politike sesa reale

Debati rreth kostos së jetesës ka marrë përmasa të reja, pasi shporta konsumatore e hartuar nga Ministria e Ekonomisë dhe Punës për muajin gusht 2026 u regjistrua në vlerën e 58.475 denarëve. Nga ana tjetër, llogaritjet e bëra për shportën minimale sindikale treguan një shifër prej 68.675 denarësh, duke krijuar kështu një diferencë prej afërsisht 10.200 denarësh mes dy raporteve. Duke komentuar këto shifra, ministri Besar Durmishi ka theksuar se dy llogaritjet mbështeten në kritere dhe metodologji krejtësisht të ndryshme. Ai ka shprehur qëndrimin se kalkulimet e sindikatave nuk pasqyrojnë realitetin ekonomik, por kanë një prapavijë më shumë politike. “Ne edhe ata persona të cilët e kanë formuluar dhe përpiluar të dhënat e shportës konusmatore kanë thënë vetë se ajo nuk është shportë minimale por është një shportë e dëshiruar kështu që sindikalistët e bëjnë një fushatë më shumë politike se sa reale. Mund të them se kemi shportën tonë që në këshillin ekonomik dhe social në javën që vjen do të prezantohet para anaëtarëve të këshillit ekonomik. Dhe për çdo muaj do të bëjmë publike të dhënat për shportën mesatare”, u deklarua Durmishi për mediat. Sipas statistikave zyrtare të Ministrisë, një familje me katër anëtarë kishte nevojë për 58.475 denarë për të mbuluar shpenzimet e muajit gusht, ku vetëm zëri i ushqimit dhe pijeve kapte vlerën e 21.132 denarëve. Krahasuar me muajin korrik, shporta e institucionit shtetëror pësoi një rritje minimale prej 29 denarësh, kurse në raport me muajin janar të vitit 2026, ajo u rrit për 2.095 denarë, ose e thënë ndryshe, për 3,7 për qind. Nga ana e tij, dikasteri qeveritar sqaron se metodologjia e tyre mbështetet në statistika zyrtare nga institucionet kompetente, përfshirë Entin Shtetëror të Statistikave, si dhe në vëzhgimin e çmimeve të artikujve në tetë qytete të ndryshme, në 23 tregje jeshile dhe në supermarketet e mëdha të vendit. Sipas ministrit Durmishi, ky qasje synon të japë një pamje sa më të saktë të konsumit mesatar real të familjeve. Ndërkohë, Lidhja e Sindikatave të Maqedonisë (LSM) bëri të ditur se shporta minimale sindikale për periudhën e gushtit arriti në 68.675 denarë, ndërsa tendenca rritëse vazhdoi edhe në shtator, periudhë në të cilën kjo shifër u ngjit në 69.432 denarë, duke shënuar një shtesë prej 757 denarësh brenda vetëm një muaji.