Gani Geci përfundon në spital, Gjykata e Apelit merr vendim për paraburgimin e tij

Ish-deputeti Gani Geci po trajtohet aktualisht në Spitalin e Përgjithshëm të Pejës, pasi gjendja e tij shëndetësore është përkeqësuar gjatë ditës së djeshme. Sipas informacioneve të siguruara, Geci ka kërkuar ndihmë mjekësore për shkak të komplikimeve me tensionin e lartë të gjakut. Ai ndodhet ende nën përkujdesjen e stafit shëndetësor dhe nuk është liruar ende nga institucioni spitalor. Paralelisht me gjendjen e tij shëndetësore, çështja gjyqësore ndaj Gecit ka shënuar zhvillime të reja. Gjykata e Apelit ka marrë vendim sot për të hedhur poshtë ankesën e ushtruar nga mbrojtja e tij. Avokatët e Gecit kishin kërkuar anulimin e vendimit të Gjykatës Themelore për caktimin e masës së paraburgimit dhe lirimin e menjëhershëm të tij, mirëpo kjo kërkesë nuk është aprovuar nga instanca e dytë e drejtësisë.