“Dal për të ardhmen e fëmijëve tanë” – Qytetari në shesh: Kreu i Qeverisë s’është i besueshëm për marrëveshje

Protestës së zhvilluar para godinës së Kryeministrisë i është bashkuar edhe një qytetar në moshë të thyer, i cili ka theksuar se motivi i pranisë së tij në shesh është mbështetja e pakushtëzuar për brezin e ri dhe studentët. “Jam në këtë protestë për hir të rinisë, për të drejtat e studentëve”, u shpreh ai gjatë bisedës me gazetarët. Gjatë fjalës së tij, ai ka hedhur poshtë çdo mundësi apo shpresë për një dialog real mes kreut të qeverisë dhe studentëve, duke kujtuar se gjatë muajve të shkuar nuk është vënë re asnjë vullnet për të dëgjuar zërin e protestuesve. “Kam punuar për plot 40 vjet dhe marr një pension prej 200 mijë lekësh. Çfarë mund të bësh me këto të ardhura? Jetoj falë djemve të mi, se po të mos i kisha, do të kisha vdekur. Dhe ky tani kërkon takim me studentët? Do të bëjë gjoja marrëveshje? Ai nuk është personi i duhur për të bërë marrëveshje me studentët”, deklaroi ai. Më tej, qytetari ka risjellë në vëmendje trajtimin që u është bërë familjarëve të tyre në të kaluarën, duke shtuar se mungesa e dialogut të sinqertë e bën të papranueshme çdo ftesë të momentit të fundit për bisedime. “Prindërve të këtyre studentëve u është referuar me fjalë fyese për 140 ditë me radhë. Nuk pati guximin të vinte të na takonte. E tani u thotë studentëve: ‘Hajde të bëjmë marrëveshje’. Kjo është politikë e dëmshme dhe nuk ka lidhje me interesat tona”, u shpreh ai. Në mbyllje të prononcimit të tij, ai ka ngritur shqetësimin për largimin masiv të qytetarëve nga vendi dhe varësinë ekonomike nga shtetet fqinje, duke kritikuar braktisjen e prodhimit vendas: “Synojnë ta shpopullojnë Shqipërinë. Sot ushqimet i sigurojmë nga Serbia. Ku ka përfunduar bujqësia jonë?”