Bashkëpunimi për sigurinë: E ngarkuara e SHBA-së pret në takim komandantin e ri të KFOR-it

E ngarkuara me punë në ambasadën e Shteteve të Bashkuara të Amerikës në Kosovë, Wylita Bell, ka zhvilluar një takim zyrtar me komandantin e sapoemëruar të misionit paqeruajtës të NATO-s, KFOR, gjeneralmajorin Roberto Vergori. Nëpërmjet një njoftimi zyrtar, selia diplomatike amerikane ka riafirmuar mbështetjen e palëkundur ndaj trupave paqeruajtëse në vend. "Gjatë këtij takimi u vu theksi te domosdoshmëria e garantimit të paqes dhe sigurisë afatgjatë si në Kosovë, ashtu edhe në mbarë rajonin. Shtetet e Bashkuara mbeten të përkushtuara plotësisht për të mbështetur misionin e KFOR-it në përpjekjet e tij për ruajtjen e stabilitetit", thuhet në deklaratë. Kujtojmë se gjenerali italian ka marrë drejtimin e forcave të KFOR-it gjatë këtij muaji, duke pasuar në këtë detyrë gjeneralin turk, Ozkan Ulutas.