Seanca e nesërme e Kuvendit: Në fokus përbërja e komisioneve dhe votimi përfaqësuesve të Listës Serbe

Kuvendi i Kosovës do të mblidhet nesër, ditë e enjte, në orën 10:00, për të zhvilluar seancën e radhës plenare, sipas njoftimit zyrtar të lëshuar nga Drejtoria për media dhe marrëdhënie me publikun. Në fokus të punimeve të kësaj seance do të jetë krijimi i Komisionit Ad-Hoc, i cili do të merret me përzgjedhjen e kandidatëve për anëtarë të Bordit të Radiotelevizionit të Kosovës (RTK), konkretisht dy nga komuniteti shqiptar, një nga ai serb, si dhe një përfaqësues nga komunitetet e tjera jo shumicë. Një tjetër çështje me rëndësi në rendin e ditës do të jetë shqyrtimi dhe votimi i propozimit të paraqitur nga Grupi Parlamentar i Listës Serbe, që lidhet me caktimin e deputetëve të këtij subjekti në trupat e përhershme parlamentare. Agjenda e punës do të nisë me miratimin e procesverbalit nga mbledhja e kaluar, për të vazhduar më pas me deklarimet e deputetëve jashtë rendit të ditës dhe pyetjet parlamentare drejtuara kabinetit qeveritar.