Goditje e rëndë për PSG-në, dëmtimi i rëndë e lë Kvaratskhelian jashtë fushave për muaj të tërë

Khvicha Kvaratskhelia po përballet me njërën nga periudhat më sfiduese të karrierës së tij sportive, pasi ka pësuar një dëmtim serioz në gjurin e djathtë gjatë përballjes së Paris Saint-Germainit kundër Barcelonës në kuadër të Ligës së Kampionëve. Klubi francez ka konfirmuar zyrtarisht se sulmuesi nga Gjeorgjia ka pësuar këputje të ligamentit të kryqëzuar anterior dhe në ditët në vijim do t'i nënshtrohet një ndërhyrjeje kirurgjikale. Ky lëndim tejet i rëndë parashikohet ta largojë atë nga fushat e blerta për një periudhë disa mujore. Ngjarja e pakëndshme ndodhi gjatë triumfit 4-2 të parisienëve ndaj katalunasve, moment kur Kvaratskhelia u detyrua të braktiste fushën e lojës, pa mundur dot të mbështeste këmbën e djathtë në tokë. Pas kësaj goditjeje, futbollisti ka ndarë ndjenjat e tij përmes një reagimi shumë emocional. “Isha gati për gjithçka, por jo për këtë. Para çdo ndeshjeje, thjesht e lus Zotin që të kthehem në shtëpi i shendetshëm. Një gjë më bjen në mend: Pse bash mua? Pse unë o Zot? Sidoqoftë, e kuptoj se Zoti më ka zgjedhur mua. Nëse duhej të më ndodhte mua, i ka shpëtuar të tjerët që ishin në fushë. Tash jam i gatshëm ta duroj dhimbjen, të punoj fort, të vuaj dhe të derdh lot. E di se më duhet të kthehem më i fortë për të dashurit e mi, të cilët gjithmonë janë në anën time. Do ta bëj më të mirën, të jeni të sigurtë. Faleminderit për mbështetjen”, ka shkruar Kvara. Për trajnerin Luis Enrique, mungesa e gjatë e Kvaratskhelias përbën një lajm tejet shqetësues, duke llogaritur se sulmuesi ka qenë ndër shtyllat kryesore të skuadrës në paraqitjet e fundit evropiane. Sfidat për kampionët e Evropës janë shtuar edhe më shumë, pasi e njëjta ndeshje solli dëmtime edhe për Ousmane Dembélé dhe Marquinhos. Të dy lojtarët po vuajnë nga probleme në kofshë dhe do t'i nënshtrohen protokolleve mjekësore gjatë javëve në vijim. Pasi ka dhënë një kontribut thelbësor në ecurinë e deritanishme të PSG-së, mungesa e afatgjatë e Kvaratskhelias përfaqëson një pengesë serioze për aspiratat e klubit si në arenën vendore ashtu edhe në atë evropiane. Me gjithë suksesin e arritur kundër Barcelonës, trupa e drejtuar nga Luis Enrique detyrohet tani të përshtatet me një realitet të ri, duke humbur për disa muaj një prej elementëve të saj më cilësorë. Fokusi i tanishëm për Kvaratskhelian mbetet operacioni dhe faza e rikuperimit, ndërkohë që drejtuesit dhe stafi teknik i PSG-së duhet të skicojnë zgjidhjet e duhura për të kompensuar mungesën e tij të ndjeshme.