Goditje e rëndë për Barcelonën: Zbardhet koha e saktë e mungesës së Dani Olmos

Klubi i Barcelonës ka marrë konfirmimin zyrtar mbi shkallën e dëmtimit të mesfushorit Dani Olmo. Futbollisti spanjoll u detyrua të braktiste fushën e blertë qysh në fraksionin e parë të sfidës ndaj Paris Saint-Germainit, e cila u luajt të martën në stadiumin “Parc des Princes”. Sipas të dhënave mjekësore, lojtari do të duhet të qëndrojë jashtë fushave për një periudhë prej rreth katër javësh, pasi ka pësuar një dëmtim në muskulin aduktor. Kjo mungesë përbën një dhimbje koke serioze për trajnerin Hansi Flick, i cili po përballet me një kalendar tejet të ngjeshur të ndeshjeve. Incidenti ndodhi rreth minutës së 25-të të takimit, kur Olmo u ndesh me Vitinhën dhe u rrëzua në tokë pas një mbështetjeje të gabuar të këmbës. Pasi u asistua nga stafi mjekësor i katalunasve dhe shfaqi shenja të qarta dhimbjeje, ai provoi të ecte, por u bë e pamundur vazhdimësia e lojës, duke bërë që Fermín López të hynte në fushë në vend të tij. Ky dëmtim vjen në momentin më të papërshtatshëm, pikërisht kur Olmo po rifitonte formën e tij ideale dhe kishte nisur sërish të shënonte, duke hedhur pas krahëve periudhën e vështirë të përshtatjes në fillim të sezonit dhe duke u shndërruar në një element kyç për skemat e skuadrës. Paraqitja nga minuta e parë në Paris dukej si shansi ideal për të konfirmuar ecurinë pozitive, por fati deshi që aventura e tij të mbyllej pas vetëm 25 minutash. Kjo la një boshllëk të madh në repartin e avancuar të Barcelonës, duke i privuar ata nga aftësia e spikatur e Olmos për të çeduar nga linja e dytë drejt zonës kundërshtare. Prania e tij mes linjave është një nga armët më të forta që Flick ka në dispozicion, ndaj mungesa e këtyre depërtimeve u reflektua menjëherë në dinamikën e lojës sulmuese të katalunasve. Megjithatë, lajmi më i dhimbshëm për fanellën blaugrana mbetet ndikimi i këtij dëmtimi në kalendar. Dani Olmo do të mungojë me siguri në “El Clasicon” e së dielës së ardhshme kundër Real Madridit, një nga duelet më të rëndësishme të sezonit që ai po e priste me mjaft padurim.