Trazirat në kryeqytet: Policia vë në pranga 11 persona, mes tyre dy të mitur, kapet edhe 33-vjeçari që sulmoi Komisariatit nr. 3

Gjatë hetimeve intensive për aktet e dhunës të regjistruara gjatë protestës së fundit në kryeqytet, Policia e Tiranës ka ndërmarrë një aksion duke arrestuar 11 persona, mes të cilëve dy të mitur, ndërkohë që janë proceduar penalisht në gjendje të lirë edhe 7 qytetarë të tjerë. Në kuadër të këtyre verifikimeve, autoritetet kanë bërë të mundur kapjen dhe ndalimin e një 33-vjeçari. Ky i fundit dyshohet si një nga autorët kryesorë të dëmtimit të ambienteve të Komisariatit nr. 3 gjatë tubimeve të zhvilluara ditët e kaluara, ngjarje ku mbetën të lënduar 10 efektivë policie. Sipas njoftimit zyrtar të Drejtorisë Vendore të Policisë Tiranë, në vijim të veprimeve hetimore lidhur me paligjshmëritë e shënuara gjatë protestës së djeshme, janë vënë në pranga në flagrancë shtetasit E. P., 29 vjeç, G. K., 24 vjeç, F. B., 19 vjeç, E. B., 23 vjeç, S. D., 52 vjeç, E. B., 27 vjeç, A. D., 23 vjeç, L. Z., 18 vjeç dhe E. B., 20 vjeç, si dhe dy shtetas të mitur. Gjithashtu, 7 persona të tjerë janë ndjekur penalisht në gjendje të lirë. Paralelisht, specialistët për Hetimin e Krimeve në Komisariatin e Policisë Nr. 3 kanë finalizuar procedurat për identifikimin dhe kapjen e personave që sulmuan punonjësit e rendit dhe godinën zyrtare me lëndë piroteknike, gurë dhe bomba molotov. Si pasojë e këtyre sulmeve, u shkaktuan dëme materiale dhe zjarr në ndërtesën e komisariatit, ndërsa u plagosën 10 efektivë policie. Për këto veprime është identifikuar dhe ndaluar shtetasi E. K., 33 vjeç, i dyshuar se tri ditë më parë ka goditur me sende të forta ambientet e këtij institucioni. Të gjitha materialet procedurale i janë përcjellë Prokurorisë për veprime të mëtejshme. Të arrestuarit dhe të proceduarit do të ballafaqohen me akuza të rënda, ku përfshijnë “Shkatërrimin e pronës”, “Shkatërrimin e pronës me zjarr”, “Goditjet për shkak të detyrës”, “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të Policisë të rendit publik”, “Prishja e qetësisë publike”, “Mosbindja ndaj urdhrit të punonjësit të policisë së rendit publik”, “Shkelja e rregullave mbi lëndët plasëse, djegëse dhe radioaktive”, “Pengimi i qarkullimit të mjeteve”, “Mbajtja pa leje dhe prodhimi i armëve, armëve shpërthyese dhe i municionit” si dhe “Prodhimi, mbajtja, blerja apo shitja pa leje e armëve të ftohta”.