Performancë madhështore e PSG-së, Hakimi: Synojmë sërish majën e Evropës

Mbrojtësi i Paris Saint-Germainit, Achraf Hakimi, ka shprehur krenari të madhe pas triumfit spektakolar 4-2 kundër Barcelonës, në kuadër të fazës së ligës në Ligën e Kampionëve. Kampionët në fuqi të Evropës kanë konfirmuar edhe një herë potencialin e tyre të jashtëzakonshëm në arenën ndërkombëtare. Pas triumfit me të njëjtin rezultat ndaj Manchester Cityt shtatë ditë më parë, parisienët kanë mposhtur gjithashtu Barcelonën, e cila deri në këtë duel nuk Të kishte pësuar asnjë disfatë gjatë këtij sezoni. “Kur përballesh me një kundërshtar të tillë, dëshiron t’i dëshmosh se ne jemi kampionët dhe se synojmë të vazhdojmë serinë e fitoreve. Duam të tregojmë se bëjmë pjesë ndër ekipet më të mira në glob, ndoshta edhe më i miri për momentin”, theksoi Hakimi gjatë një prononcimi për “CBS Sports”. Në një deklaratë dhënë për mediumin francez Foot Mercato, futbollisti nga Maroku ka bërë një analizë të kundërshtarit dhe vështirësisë së ndeshjes. “Ishim të vetëdijshëm se do të ishte një sfidë tejet e ndërlikuar. Përballë kishim një nga skuadrat më cilësore në botë, e cila nuk ishte mposhtur ende këtë edicion. Megjithatë, grupi ynë është i jashtëzakonshëm”, u shpreh ai. Edhe pse katalanasit barazuan rezultatin dy herë, duke mbajtur tensionin deri në sekondat e fundit, skuadra e PSG-së dëshmoi karakter dhe arkëtoi një tjetër fitore me peshë në kompeticionin elitar evropian. “Ishte një takim fantastik për shikuesit, por edhe ne e shijuam në fushën e blertë. Në ndeshje të këtij niveli është thelbësore të mbrohesh dhe të sulmosh me standarde shumë të larta”, shtoi anëtari i parisienëve. Në fund, Hakimi ka konfirmuar qartë ambiciet e larta të klubit për këtë edicion futbollistik, duke synuar mbrojtjen e trofeut më të rëndësishëm në kontinent. “Kemi një synim madhështor që dëshirojmë ta shndërrojmë në realitet këtë vit: ta fitojmë përsëri Ligën e Kampionëve. Qëllimi ynë është të vazhdojmë rrugëtimin tonë fitues”, përfundoi ai. Mbrojtësi gjithashtu i thuri lavde edhe kontributit të trajnerit Luis Enrique, i cili sipas tij kujdeset që ekipi të ruajë vazhdimisht mentalitetin e fituesit. “Trajneri punon çdo ditë që të mos e humbasim kurrë mentalitetin fitues. Ne japim gjithçka në fushë dhe shpresojmë të vazhdojmë me këtë ritëm fitoresh”, përmbylli Hakimi.