Magjia e Lamine Yamal ndaj PSG-së lë pa fjalë legjendën Alessandro Del Piero

Supergoli i shënuar nga Lamine Yamal kundër Paris Saint-Germain në Ligën e Kampionëve ka lënë mbresa të pashlyeshme edhe te një ikonë e futbollit botëror si Alessandro Del Piero. Gjatë një analize në “Sky Sport”, ish-kapiteni i njohur i Juventusit zbërtheu hollësisht elementët teknikë të aksionit vendimtar, i cili i dha mundësi yllit të ri të Barcelonës të çante prapavijën pariziene dhe të mposhtte portierin Matvey Safonov. Në vlerësimin e tij, Del Piero u ndal fillimisht te faza përgatitore e aksionit: “Është thjesht spektakol të vëresh se si ai shfrytëzon në maksimum pasaktësinë e Warren Zaire-Emery në daljen nga mbrojtja. Por ajo që bie në sy është kontrolli i topit; menjëherë ai e ul sferën me gjoks, duke e orientuar trupin drejt mbrojtësit për të marrë iniciativën e sulmit. Kjo sjell një kthesë rrënjësore në dinamikën e lojës, sepse në vend që të presë, ai i sulmon menjëherë kundërshtarët, i cili ndërkohë pozicionohet nga brenda, i frikësuar nga rreziku që vjen nga krahu i majtë”. Duke vijuar analizën e tij, ish-sulmuesi i kombëtares italiane vuri në dukje finesën e fundit të aksionit: “Sapo dallon hapësirën boshe, ai shpërthen me shpejtësi dhe aty shfaqet momenti i gjenialitetit të pastër. Me atë hov, ai godet topin me majën e këmbës. Dhe nuk mjaftohet me kaq, pasi arrin edhe ta ngrejë atë në ajër. Për mua, kjo ishte një lëvizje krejtësisht e paramenduar. Po ta kishte goditur tokazi, portieri Safonov do të kishte mundur ta ndalte me gju”.